ބ.ތުޅާދޫގައި "ހައިޑްރޯޕޮނިކްސް" ނިޒާމުން ގަސް އިންދުމުގެ ތަމްރީން ޕްރޮގްރާމެއް ކުރިއަށްގެންގޮއްސިއެވެ.  މިކަމާއި ގުޅޭ ތަމްރީން ޕްރޮގްރާމް ފައްޓަވައިދެއްވީ ދަނޑުވެރިކަމާއި ދިރޭތަކެއްޗާއި ބެހޭ ވުޒާރާގެ ސްޓޭޓް މިނިސްޓަރ ޙުސައިން އިސްމާޢިލްއެވެ.

ބ.ތުޅާދޫގައި "ހައިޑްރޯޕޮނިކްސް" ނިޒާމް ޤާއިމްކޮށް 10 ދަނޑުވެރިއަކަށް ދަނޑުވެރިކަން ކުރެވޭނެ އިންތިޒާމްތައް ހަމަޖައްސައިދޭނެކަމަށް އެ ވުޒާރާއިން ވަނީ ބުނެފައެވެ. 

ދަނޑުވެރިކަމާއި ބެހޭ ވުޒާރާއިން ވިދާޅުވީ، މި ޕްރޮގްރާމްގެ މަޤްސަދަކީ ގޯތި ތެރޭގައި ހުސްބިންކޮޅުގައި ދަނޑުވެރިކަމުގެ މަސައްކަތްކޮށްގެން އެދެވޭ މަންފާއެއް ހޯދުމުގެ މަގު ފަހިކޮށްދިނުންކަމަށެވެ. އެހެންކަމުން ދަނޑުބިމުގެ ގޮތުގައި ބޭނުންކުރުމަށް އެކަށީގެންވާ ބިން ލިބެންނެތް ރަށްރަށުގައި "ހައިޑްރޯޕޮނިކްސް" ސިސްޓަމް ޤާއިމްކުރުމުގެ މަސައްކަތް ކުރަމުންދާކަމަށް ވަނީ ވިދާޅުވެފައެވެ.

މި ޕްރޮގްރާމްގެ ދަށުން ބ.ތުޅާދޫގެ 10 ދަނޑުވެރިއަކަށް "ހައިޑްރޯޕޮނިކްސް" ސިސްޓަމް މިނިސްޓްރީގެ އެހީތެރިކަމާއިއެކު ޤާއިމްކޮށްދޭނެއެވެ. މި ޕްރޮގްރާމްގެ ދަށުން "ހައިޑްރޯޕޮނިކްސް" ނިޒާމް ޤާއިމްކޮށް ކޮންމެ ދަނޑުވެރިއަކަށް ލެޓިއުސްފަދަ ފަތްޕިލާވެލި ހައްދާ ސިސްޓަމަކާއި ކިޔުކަންބަ އަދި މެލަންގެ ބާވަތްތައް ހެއްދުމަށް ހާއްސަ ސިސްޓަމެއް ޤާއިމްކުރާނެއެވެ.

ފަތްޕިލާވެލި އިންދުމަށް ޚާއްސަ ސިސްޓަމްތަކުން ކޮންމެ ސިސްޓަމަކުން 12 ކިލޯ އަދި ކިޔުކަންބާއާއި މެލަން ހެއްދުމަށް ޚާއްސަ ސިސްޓަމްތަކުން ކޮންމެ ސިސްޓަމަކުން 65 ކިލޯ އުފެއްދޭނެކަމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ވަނީ ވިދާޅުވެފައެވެ.