ރައްޔިތުންގެ މަޖިލީހުގެ ބޮޑު އަގުލަބިއްޔަތަކުން ރުހުން ނުދިން ވަޒީރުންތަކެއް އަލުން ވަޒީރުންގެ މަޖިލީހަށް ރައީސުލްޖުމްހޫރިއްޔާ ޢައްޔަނުކުރުމަކީ، ސަރުކާރުން ގާނޫނުއަސާސީގެ ހުރުމަތް ކަނޑާލުންކަމަށް ބުނެ، ދަ ޑިމޮކްރެޓްސްއިން އެކަން ކުއްވެރިކޮށްފިއެވެ.

ރައީސުލްޖުމްހޫރިއްޔާ ޢަމަލުކުރެއްވި ގޮތް ކުއްވެރިކޮށް، ދަ ޑިމޮކްރެޓްސްއިން ނެރުނު ނޫސް ބަޔާނުގައި ބުނެފައި ވަނީ، ރައްޔިތުންގެ މަޖިލީހުން ރުހުން ނުދިން ވަޒީރުންތަކެއް އަލުން އައްޔަންކުރުމަކީ ގާނޫނުއަސާސީގެ ހުރުމަތްކަނޑާލުން ކަމަށާއި، ރައްޔިތުންގެ މަޖިލީހަށް ރުހުން ހޯދުމަށް، އެ ވަޒީރުންގެ ނަންތަކެއް އަލުން އަނބުރާ ނުފޮނުވޭނެ ކަމަށެވެ.

އަދި ހަމައެހެންމެ، ރައްޔިތުންގެ މަޖިލީހުން ރުހުން ނުދިން މީހަކު ބަންޑާރަނައިބުގެ ހައިސިއްޔަތާ އަމިއްލަ ޒާތީ ތައައްސުބުގެ ދެމެދުގައި ތާށިވެ ހުރެގެން، ގާނޫނުއަސާސީގެ އިންތަކާ މިންތަކުން ބޭރުން ގާނޫނީ ލަފަޔާއި ރައުޔުތައް ނެރެ، ދައުލަތް ތަމްސީލެއް ނުކުރެވޭނެ ކަމުގައިވެސް ދަ ޑިމޮކްރެޓްސްއިން ވަނީ ބުނެފައެވެ.

ދަ ޑިމޮކްރެޓްސް އިން ބުނެފައި ވަނީ އެޕާޓީން، ރައީސް ޑރ. މުޙައްމަދު މުއިއްޒުގެ އެ އަމަލުތައް ބަލައެއް ނުގަންނަކަމަށާއި، އަދި ގާނޫނުއަސާސީގެ ހުރުމަތާއި، ދުނިޔޭގެ ޑިމޮކްރެޓިކް ހަމަތަކާއި، ގާނޫނީ ދައުލަތްތަކުގެ ނިޒާމުތައް ރޭވިފައި އޮންނަ އެންމެ އަސާސީ މަފްހޫމުތަކަށް ކުޑައިމީސް ނުކުރެއްވުމަށް ހަނދުމަފުޅުކޮށް އަރުވާކަމަށެވެ.