ސްޓެލްކޯއިން ފެނަކަ ކޯޕަރޭޝަނަށް، ހިލޭ ސާބަހަށް، ފަންނީ އެހީތެރިކަން ފޯރުކޮށް ދެއްވާނެ ކަމުގައި ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވެއްޖެއެވެ.

ފަޙްމީ މިހެން ވިދާޅުވީ، ފެނަކަ ކޯޕަރޭޝަން ލިމިޓެޑްގެ މަސައްކަތްތަކަށް ބޭނުންވާ ފަންނީ އެހީތެރިކަން ފޯރުކޮށްދިނުމަށްޓަކާ ސްޓެލްކޯ އާއި ފެނަކަ އާއި ދެމެދު ފަހުމުނާމާގައި ސޮއިކުރުމަށް މިއަދު ބޭއްވި ރަސްމިއްޔާތުގައި ދެއްކެވި ވާހަކަފުޅުގައެވެ.

ފަޙްމީ ވިދާޅުވީ، އެ ފަހުމުނާމާގެ ދަށުން ސްޓެލްކޯއިން ކޮށްދޭ ގިނަ ކަންކަން ވެގެންދާނީ އަގުނެގުމަކާއި ނުލައި، ރައްޔިތުންނަށް ދެ ކުންފުނިން ދޭ ޚިދުމަތުގެ ފެންވަރުގެ މަތިކުރުމުގެ މަޤުޞަދުގައި ކޮށްދޭ ކަންތައްތަކަށް ކަމަށެވެ. އެގޮތުން، އެ އެއްބަސްވުމުގެ ދަށުން ސްޓެލްކޯއިން ފެނަކަ ކޯޕަރޭޝަނަށް، ހިލޭ ކޮށްދެވެން ހުރި ހުރިހާކަމެއް ހިލޭ ކޮށްދެއްވާނެ ކަމަށާއި، ގަންނަން ޖެހޭ މުދާ ގަތުމުގައި އެކުންފުނިން ދައްކަން ޖެހޭ އަގެއް ފިޔަވައި އެހެން ކަންކަން ވީހާވެސް ލުއިގޮތަކަށް ކޮށްދެއްވާނެ ކަމުގައިވެސް ފަޙްމީ ވިދާޅުވިއެވެ.

ފަޙްމީގެ ވާހަކަފުޅުގައި، ފެނަކަ ކޯޕަރޭޝަން މިހާރު އޮތް ހާލަތުން އަރައިގަތުމަށާއި، އެކުންފުނި ސަލާމަތްކުރުމަށް އެހީތެރިކަން ބޭނުންވާކަންވެސް ފާހަގަކުރެއްވިއެވެ.

ފަޙްމީ ވިދާޅުވީ، ފެނަކައިގައި މިހާރުވެސް ޓެކްނިކަލް ކެޕޭސިޓީ ހުރިކަމަށް ޤަބޫލުކުރައްވާ ކަމަށާއި، ނަމަވެސް އެ ކުންފުނިން ޚިދުމަތްދޭ ރަށްތައް ގިނަވުމުން، ސްޓެލްކޯއިން ފޯރުކޮށްދޭ ފަންނީ ތަމްރީނުތަތަކުގެ ނަތީޖާއަކަށް ވެގެންދާނީ، ދެ ކުންފުނިން ރައްޔިތުންނަށް ފޯރުކޮށްދޭ ޚިދުމަތް އިތުރަށް ފުޅާވެ، ދެވޭ ޚިދުމަތަށް ރައްޔިތުންގެ ޔަޤީންކަން އިތުރުވެގެންދިޔުން ކަމަށެވެ.

ސަރުކާރުގެ ކުންފުނިތަކުގެ ތެރެއިން ފެނަކަ ކޯޕަރޭޝަނަކީ، މިވަގުތު އެންމެ ނާޒުކު ޙާލަތުގައި އޮތް ކުންފުންޏެވެ. އެކުންފުނީގެ ދަރަނިތައް ބޮޑުވެ ދަރަންޏާއި ޚަރަދުތައް ކުޑަކުރެވޭނެ ހުރިހާ މަގަކުން މަސައްކަތްތައް ކުރުމަށް އޮތީ މަޖުބޫރުވެފައެވެ. އެހެންވެ ދާދިފަހުން އެކުންފުނިން ވަނީ، އެކުންފުނީގެ ކޮންޓްރެކްޓް މުވައްޒަފުން ތިބި އަދި މަސައްކަތްތައް ހުއްޓިފައިވާ ސައިޓްތަކަށް ނަގާފައިވާ މުވައްޒަފުންގެ ކޮންޓްރެކްޓް އައު ނުކުރުމަށްވެސް ނިންމާފައެވެ.