ރައްޔިތުންގެ މަޖިލީހުގެ މެމްބަރުންގެ އަދަދު ކަނޑައެޅުމުގައި، މަޖިލީހުގެ ޤަވާއިދަށް ގެނައި ބަދަލުން، ރައީސުލްޖުމްހޫރިއްޔާ އަޒުލްކުރުމަށް ލިބޭ ފުރުޞަތު ހަނިކުރުމަށް ޤަވާއިދަށް ގެނައި ބަދަލު ބާޠިލްކުރުމަށް، ބަންޑާރަ ނައިބުގެ ފަރާތްޕުޅުން ދިވެހިރާއްޖޭގެ ސްޕްރީމްކޯޓަށް ދުސްތޫރީ މައްސަލައެއް ހުށައަޅައިފިއެވެ.

ބަންޑާރަ ނައިބުގެ އޮފީހުން ހާމަކުރައްވާފައިވާ ގޮތުގައި، އެ ދުސްތޫރީ މައްސަލަ ދިވެހިރާއްޖޭގެ ސްޕްރީމްކޯޓަށް ހުށައަޅާފައި ވަނީ، މި ޖެނުއަރީމަހުގެ 28 ވަނަ ދުވަހުގައެވެ.

ބަންޑާރަ ނައިބުގެ އޮފީހުން ވިދާޅުވާ ގޮތުގައި، ރައްޔިތުންގެ މަޖިލީހުގެ ޖުމްލަ މެންބަރުންގެ ޢަދަދު ކަނޑައެޅުމާ ގުޅޭގޮތުން، 19 ވަނަ ރައްޔިތުންގެ މަޖިލީހުގެ 2023 ވަނަ އަހަރުގެ 3 ވަނަ ދައުރުގެ 37 ވަނަ ޖަލްސާއިން ފާސްކޮށް، ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާއަށް އިތުރުކޮށްފައިވާ، (ކ)، (އ) އަދި (ވ) ގައި، "މަޖިލީހުގެ ޖުމްލަ މެންބަރުން" މި ޢިބާރާތަށް ދީފައިވާ މާނަކުރުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނޫއަސާސީއާ ޚިލާފަށް ދީފައިވާ މާނަކުރުމެއް ކަމުގައި ބަންޑާރަ ނައިބު ދެކެވަޑައިގަންނަވައެވެ. އެހެންވެ ބަންޑާރަ ނައިބުގެ ފަރާތްޕުޅުން ހުށައެޅި ދުސްތޫރީ މައްސަލައިގައި އެދިވަޑައިގެންފައި ވަނީ، ރައްޔިތުންގެ މަޖިލީހުގެ ގަވާއިދުގެ 49 ވަނަ މާއްދާގެ (ކ)، (އ) އަދި (ވ) އަކީ ބާޠިލް އަކުރުތަކެއް ކަމުގައި ކަނޑައަޅައިދިނުމަށް ކަމުގައިވެސް ބަންޑާރަ ނައިބުގެ އޮފީހުން ވިދާޅުވެއެވެ.

ރައްޔިތުންގެ މަޖިލީހުގެ ޤަވާއިދަށް އިސްލާޙް ގެނައީ، އައު ސަރުކާރުގެ މަޤާމުތަކަށް ދިޔުމަށްޓަކައި ސަރުކާރަށް ނިސްބަތްވާ 6 މެމްބަރަކު އެބޭފުޅުން ތިއްބެވި މަޤާމުތަކުން އިސްތިއުފާ ދެއްވުމާއި ގުޅިގެން އެދާއިރާތަކުގެ ބައި-އިލެކްޝަން ނުބޭއްވުމަށް އިލެކްޝަންސް ކޮމިޝަނުން ނިންމުމާއި ގުޅިގެންނެވެ. އެހެންވެ ކުރިޔަށް އޮތް ދައުރުގައި ރައްޔިތުންގެ މަޖިލީހުގައި އެދާއިރާތަކުގެ ގޮނޑިތަކުގައި މެމްބަރުން ނުތިއްބަވާނެތީ، މަޖިލީހުން ނިންމާ ނިންމުންތަކުގައި އެގޮނޑިތައް ތަމްސީލް ކުރާނެ މެމްބަރުން ނެތި ނަގާ ވޯޓުގައި އަދަދު ކަނޑައަޅަން ޖެހޭނީ އެގޮނޑިތައް ނުހިމަނާކަމުގައި މަޖިލީހުން ވަނީ ފާސްކޮށްފައެވެ. މަޖިލީހުގެ ޤަވާއިދަށް ގެނައި އެބަދަލާއެކު ރައީސުލްޖުމްހޫރިއްޔާ އާއި އެމަނިކުފާނުގެ ނައިބު 54 ވޯޓުން މަޤާމުން ވަކިކުރެވެއެވެ. އެބަދަލު ގެނައި އިރު އެމްޑީޕީގައި 56 މެމްބަރުން ތިއްބެވިއެވެ. ފަހުން އޭގެ ތެރެއިން 13 މެމްބަރަކު، ވެރިކަންކުރާ ޕީއެންސީއާ ގުޅިވަޑައިގެންނެވި ނަމަވެސް، މަޖިލީހުގެ ތެެރެއިން އެމްޑީޕީއާ ދަޑިމޮކްރެޓްސްއިން ގުޅިގެން މަސައްކަތް ކުރަން ފަށާފައިވާއިރު އެދެޕާޓީގައި 56 މެމްބަރުން އެބަތިއްބެވެ. ކުރިން އޮތް ގޮތުން ރައީސުލްޖުމްހޫރިއްޔާއާއި އެމަނިކުފާނުގެ ނައިބު މަޤާމުން ވަކިކުރަން ބޭނުންވަނީ 58 ވޯޓެވެ.

ރައީސުލްޖުމްހޫރިއްޔާ މަޤާމުން ޢަޒުލްކުރުމަށް އެމްޑީޕީގެ ޕާލަމެންޓްރީ ގުރޫޕުން ނިންމައި އެމައްސަލަ މަޖިލީހަށް ވެއްދުމަށް ވަނީ ސޮއެ ހަމަކޮށް ތައްޔާރުވެފައެވެ. އެމައްސަލަ މަޖިލީހަށް ވަރަށް އަވަހަށް ހުށައަޅާނެ ކަމުގައި އެމްޑީޕީން ވަނީ ބުނެފައެވެ.