Advertisement
ފޮޓޯ: ޕީއެސްއެމް
މާލޭ މަގުތަކުން ވިއްކި ޕާކިން ސްލޮޓްތަކަށް ޝަކުވާއަށް ހުޅުވާލައިފި
ހަތަރު ފުރޮޅުލީ އުޅަނދުތަކަށް މާލޭގެ މަގުމަތިން ދޫކުރި ޕާކިން ޖާގަތަކާ ގުޅޭގޮތުން ޝަކުވާ ހުށަހަޅަން، ސިޓީ ކައުންސިލުން ހުޅުވާލައިފިއެވެ.
އެ ކައުންސިލުން ކުރި އިއުލާނުގައި ބުނީ ޕާކިން ސްލޮޓް ލިބުނު މެސެޖަށް ފަހު އިތުރު މުއާމަލާތެއް ނުކުރާ މީހުންނާއި ޕާކިން ސްލޮޓް ލިބުނުކަން އެންގުމަށް ފަހު އެއްބަސްވުން ނުހަދާ އަދި އެކަމާ ގުޅޭ އިތުރު ޝަކުވާތައް ހުރި ނަމަ، ޝަކުވާ ހުށަހަޅާ ޕޯޓަލް މެދުވެރިކޮށް އަންނަ މަހުގެ 5 ވަނަ ދުވަހުގެ ކުރިން ހުށަހަޅަން އެދޭކަމަށެވެ.
މާލޭގެ މަގުތަކުގައި ކުރަހައި ޕާކިން ސްލޮޓްތައް ވިއްކީ މިހާރުގެ ރައީސް ޑރ. މުހައްމަދު މުއިއްޒު، މާލޭގެ މޭޔަރަކަށް ހުންނެވިއިރުއެވެ. އެއިރުވެސް ގިނަ ބަޔަކު މިކަމުގެ ޝަކުވާ ކުރިއެވެ. އަދި މީގެ ސަބަބުން މިހާރުވެސް ޕާކިންގެ މައްސަލަ ދިމާވެފައިވާ މާލެ ސިޓީއަށް މި މައްސަލަ އިތުރަށް ދިމާވިކަމަށް މީހުން ވަނީ ބުނެފައެވެ.
ސިޓީ ކައުންސިލުން ބުނީ ޖާގަ ލިބުނު މީހުން ދައްކަންޖެހޭ ފީ ނުދެއްކުމާއި ބައެއް މީހުންނަށް ޖަވާބު ނުދީ އަދި އުސޫލުތަކާ ހިލާފަށް ވެސް ޖާގަ ދީފައި އެބަހުރި ކަމަށެވެ. އެހެންވެ، އެ ކައުންސިލުން ވަނީ ޕާކިން ސްލޮޓްތައް ދޫކުރި ގޮތް ރިވިއުކުރަން ނިންމައިފައެވެ.
