މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް ޢަލީ ސަޢީދަށް، ރައްޔިތުންގެ މަޖިލީހުން ރުހުން ނުދިނުމުން ޝަހީމް ކުރީގެ ރައީސް ޞާލިޙަށް ފާޑުވިދާޅުވެ ނުރުހުންފާޅުކުރައްވައިފިއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި މަޖިލީހުން ރުހުން ނުދިން ތިން ވަޒީރުންގެ ތެރޭގައި، ޑރ. ޝަހީމް ހިމެނިވަޑައިގަންނަވައެވެ. ޝަހީމް ވިދާޅުވެފައި ވަނީ އޭނާއަށް މަޖިލީހުން ރުހުން ނުދިނީ، އެމްޑީޕީ މެމްބަރުން އެމަނިކުފާނާއި ޒާތީވެގެން ކަމަށެވެ.

ރައްޔިތުންގެ މަޖިލީހުން ޑރ. ޝަހީމަށް ރުހުން ނުދޭން ފާސްކުރެއްވުމުން، ނުރުހުންފާޅުކުރައްވައި، ކުރީގެ ރައީސް އިބްރާހީމް މުޙައްމަދު ޞާލިހަށް ފާޑު ވިދާޅުވެ، އެކްސްގައި ކުރެއްވި ޕޯސްޓެއްގައި ޝަހީމް ވިދާޅުވީ، ވެރިކަމުގައި ހުންނަވައިގެންނާއި ވެރިކަމުން ދުރުވުމަށް ފަހު ވެސް، ރާއްޖޭގެ އިސްލާމީ ކަންކަން ބަލިކަށި ކޮށްލަން މަސައްކަތް ކުރެއްވި ދެވަނަ ވެރިއެއް ރައީސް ޞާލިޙު ނޫނީ ރާއްޖެ ދެކެފައި ނުވާކަމަށެވެ.

ޑރ. ޝަހީމު ރައީސް ޞާލިޙަށް ފާޑު ވިދާޅުވުމާއި ގުޅިގެން އެހެން ފަރާތްތަކުންވެސް ވަނ، ޑރ ޝަހީމަށް ފާޑު ވިދާޅުވެފައެވެ. ޑރ. ޝަހީމްގެ އިތުރުން، ހައުސިން މިނިސްޓަރ ޑރ. ހައިދަރާއި، ބަންޑާރަ ނައިބު އަޙްމަދު އުޝާމަށް ރުހުން ނުދިނުމަށް މަޖިލީހުން މިއަދު ވަނީ ފާސްކޮށްފައެވެ.