ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޤާމުން ޢަޒުލްކުރުމަށް ރައްޔިތުންގެ މަޖިލީހަށް މިއަދު ހުށައަޅާނެ ކަމުގައި އެމްޑީޕީން ބުނެފިއެވެ.

އެމްޑީޕީގެ މަޖިލިސް މެމްބަރަކު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޤާމުން ޢަޒުލްކުރުމަށް އެމްޑީޕީގެ ޕާލަމެންޓްރީ ގްރޫޕުންވަނީ ފާސްކޮށްފައި ކަމަށެވެ. އަދި އެމައްސަލަ މިއަދު މަޖިލީހަށް ހުށައެޅުމަށް މަސައްކަތް ކުރަމުންދާކަމުގައިވެސް އެމެމްބަރު ވިދާޅުވިއެވެ.

އެނގިފައިވާ ގޮތުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ މައްޗަށް ޢިތުބާރު ނެތްކަމުގެ ވޯޓުނަގައި މަޤާމުން ޢަޒުލްކުރުމަށްޓަކައި، މަޖިލީހުގެ 38 މެމްބަރަކު ސޮއިކުރައްވައި އެޤަރާރު މިހާރު ވަނީ ތައްޔާރުކޮށްފައެވެ. ރައީސުލްޖުމްހޫރިއްޔާ މަޤާމުން ޢަޒުލްކުރުމަށް ބޭނުންވަނީ 54 ވޯޓެވެ. އެމްޑީޕީއާ ދަ ޑިމޮކްރެޓްސްގެ މެމްބަރުން އެކުގައި މިހާރު މަސައްކަތް ކުރައްވަން ފައްޓަވާފައި ވާއިރު، ދެ ޕާޓީގައި ޖުމުލަ 56 މެމްބަރުން ތިއްބަވައެވެ. އެހެންވެ ރައީސުލްޖުމްހޫރިއްޔާ މަޤާމުން ޢަޒުލްކުރުމަށް ބޭނުންވާ ސާފު އަޣުލަބިއްޔަތު އިދިކޮޅަށް މަޖިލީހުގައި އެބައޮތެވެ.