ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީގެ ފަރާތުން ވާދަކުރައްވާނެ ބޭފުޅުން ހޮވުމަށްޓަކައި ކުރިއަށްގެންދިޔަ ޕްރައިމަރީގައި މަޖިލިސް މެމްބަރުކަން ކުރައްވާފައިވާ ގިނަ ބޭފުޅުންތަކަކަށް ޓިކެޓު ކަށަވަރުވެއްޖެއެވެ.

ވަގުތީ ނަތީޖާ ދައްކާގޮތުން ޓިކެޓު ކަށަވަރުކުރައްވާފައިވާ ކުރީގެ ބައެއް މަޖިލިސް މެމްބަރުންގެ ތެރޭގައި ހިމެނެނީ:

* ފޭދޫ ދެކުނު ދާއިރާ - އިބްރާހިމް ދީދީ

* ދިއްގަރު ދާއިރާ - އަހްމަދު ނާޒިމް

* ވިލިމާލެ - މުހައްމަދު އިސްމާއިލް

* މާފަންނު މެދު - އަސްމާ ރަޝީދު

* ތިނަދޫ އުތުރު - ސައުދުﷲ ހިލްމީ

* ދިއްދޫ ދާއިރާ - އަބްދުއްލަތީފް މުހައްމަދު

* އިނގުރައިދޫ ދާއިރާ - މުހައްމަދު ފަލާހު

* މާފަންނު ދެކުނު - އަބްދުﷲ ރިފާއު (ބޮޗޭ)

* ތުލުސްދޫ ދާއިރާ - އަހްމަދު ނަސީމް

ސަރުކާރު ކޯލިޝަންގެ މަޖިލިސް ޕްރައިމަރީގެ ވޯޓުލުން ކުރިއަށްދިޔައީ އިއްޔެ ހެނދުނު 10 އިން ހަވީރު 5 އަށެވެ. މި ޕްރައިމަރީގައި 73 ދާއިރާއަކަށް 283 ކެންޑިޑޭޓުން ވާދަކުރިއެވެ. އަދި ވޯޓުލުމުގެ ހައްގު 71،597 މީހުންނަށް ލިބުނެވެ.

ދާއިރާއަށް ވާދަކުރާނެ އިތުރު ބޭފުޅަކު ނެތުމުން ޕްރައިމަރީއަކާ ނުލާ ޕީޕީއެމް/ޕީއެންސީގެ 13 ބޭފުޅަކަށް ވަނީ މަޖިލިސް އިންތިހާބުގައި ވާދަކުރެއްވުމަށް ޓިކެޓު ލިބިވަޑައިގެންފައެވެ.