ބޭންކް އޮފް މޯލްޑިވްސް (ބީއެމްއެލް)ގެ ބޯޑުގައި ތިބި ސަރުކާރު ތަމްސީލުކުރާ ނަން-އެގްޒެކެޓިވް ބޯޑު މެމްބަރުން ވަކިކުރި ނިންމުން ބަދަލުކޮށް، އޭގެ ތެރެއިން ދެ މީހަކު އަލުން ބޯޑަށް އައްޔަންކުރަން ސަރުކާރުން ނިންމާފައިފިއެވެ.

ޑިރެކްޓަރުގެ ބޯޑުން ވަކިކޮށްފައިވަނީ ޗެއާމަން ޔޫޝާއު ސައީދާއި ބޯޑު މެމްބަރުން ކަމަށްވާ ޖުވޭރިޔާ ސައީދާއި އަބްދުﷲ ހަސަނާއި އައިޝަތު ސަޖުނީ އާއި އަބްދުﷲ ހުޝާމު ޝަރީފެވެ.

ބީއެމްއެލްގެ ބޯޑުން އެ ފަސް މެމްބަރުން ވަކިކުރުމުން ބޯޑުގައި ބާކީ ތިބީ މެނޭޖިން ޑިރެކްޓަރު ކާލް ސްޓުމަކް އާއި އައިޝަތު ނޫރައްދީންގެ އިތުރުން އާންމު ހިއްސާދާރުން ތަމްސީލުކުރަން ބޯޑުގައި ތިބި މެމްބަރުން ހިމެނޭހެން ފަސް މެމްބަރުންނެވެ. ބޭންކުގެ އަސާސީ ގަވާއިދުގައިވާ ގޮތުން ކުއްލި ހާލަތެއްގައި މެނުވީ އަޅާ ފިޔަވަޅެއް އެޅޭނީ ބޯޑުގައި އަށް ޑިރެކްޓަރުން ތިބެގެންނެވެ.

Advertisement

ވަކި ކުރި ބޯޑު މެމްބަރުންގެ ތެރެއިން ދެ މެމްބަރަކު އަލުން ބޯޑަށް އައްޔަނުކޮށްފައިވެއެވެ. ބީއެމްއެލްގެ ބޯޑަށް މިއަދު އަލުން އައްޔަނުކޮށްފައިވަނީ އަބްދުﷲ ހަސަން އާއި އައިޝަތު ސަޖުނީއެވެ. ދެން ތިބި ޑިރެކްޓަރުން ވެސް އަލުން ބޯޑަށް އައްޔަނުކުރަން ސަރުކާރުން މަސައްކަތް ކުރަމުންދާ ކަމަށް މައުލޫމާތުލިބެއެވެ.

ބޯޑުން ވަކިކުރި ދެ ޑައިރެކްޓަރުން އަލުން ބޯޑަށް އައްޔަނުކުރުމުން، ބީއެމްއެލްގެ ބޯޑުގައި މި ވަގުތު ތިއްބަވާނީ ހަތް މެންބަރުންނެވެ.

ބީއެމްއެލްގެ ހިންގާ ގަވާއިދު ބުނާ ގޮތުގައި ބޯޑު މެންބަރުކަމުން ޑިރެކްޓަރުން ވަކިކުރުމާއި އައްޔަން ކުރަން ޖެހޭނީ އަހަރީ އާންމު ޖަލްސާއެއް ނުވަތަ ހާއްސަ ޖަލްސާއަކުންނެވެ. އެ ގަވާއިދުގެ ދަށުން ބޭންކުގެ ހިއްސާދާރުންގެ މަދުވެގެން 10 ޕަސަންޓު އެދިގެން ހާއްސަ ޖަލްސާއެއް ނޫނީ އީޖީއެމް އެއް ބޭއްވޭނެއެވެ.