ކުރިއަށްއޮތް ރައްޔިތުންގެ މަޖިލިސް އިންތިޚާބުގައި ޕީޕީއެމް/ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓުން ހޮވުމަށް ބާއްވާ ޕްރައިމަރީގެ ވޯޓުލުން ފަށައިފިއެވެ. މި އިންތިޚާބުގެ ވޯޓުލުން ކުރިއަށްދާނީ ހެނދުނު 10:00 އަކުން ހަވީރު 5:00 އާ ހަމައަށެވެ.

ޕީޕީއެމް/ޕީއެންސީ ޕްރައިމަރީގައި ވާދަކުރުމަށް ހުޅުވާލި ފުރުޞަތުގައި 296 މީހަކު ވަނީ އެކި ދާއިރާތަކަށް ޝައުގުވެރިކަން ފާޅުކޮށްފައެވެ. މީގެ ތެރެއިން އެންމެ ފަރާތަކުން ޓިކެޓަށް އެދި ހުށަހަޅާފައިވާތީ 13 ފަރާތަކަށް ވަނީ އެ ދާއިރާތަކުގެ ޓިކެޓު ކަށަވަރުވެފައެވެ. އެހެންކަމުން ޕްރައިމަރީގައި ވާދަކުރަނީ 283 މީހުން ކަމަށާއި، އޭގެ ތެރޭގައި 32 އަންހެނުން ހިމެނޭކަމަށް އެ ކޯލިޝަނުން ވަނީ ބުނެފައެވެ.

ޕްރައިމަރީގައި ވޯޓުލުމަށް ރާއްޖޭގެ އެކި ރަށްތައް ހިމެނޭހެން ޖުމަލް 227 ވޯޓު ފޮށި ވަނީ ބަހައްޓާފައެވެ. މާލޭގެ 4 ސަރަހައްދެއްގައި ވަނީ ވޯޓު ފޮށި ބަހައްޓާފައެވެ. އެއީ ކަލާފާނު ސްކޫލް، ޖަމާލުއްދީން ސްކޫލް، ތާޖުއްދީން ސްކޫލް އަދި ހެންވޭރު ދަނޑެވެ. މީގެއިތުރުން ވިލިމާލެ ޔޫތު ސެންޓަރާއި، ހުޅުމާލެ ކާމިލް ދީދީ ސްކޫލާއި ރެހެންދި ސްކޫލުގައިވެސް ވޯޓުފޮށިތައް ވަނީ ބަހައްޓައިފައެވެ.

މި ޕްރައިމަރީގައި ޕީޕީއެމް/ޕީއެންސީގެ 71،597 މެންބަރުންނަށް ވޯޓުލުމުގެ ޙައްގު ލިބޭކަމަށް އެ ކޯލިޝަނުން ބުންޏެވެ. ވޯޓުލުން ނިމުމުން ކޮންމެ ފޮށްޓެއް ކައިރީގައިވެސް ވަގުތީ ނަތީޖާ އިޢުލާންކުރާނެކަމަށް ޕީޕީއެމް/ޕީއެންސީން ވަނީ ބުނެފައެވެ. އަދި ހަފްތާއެއްގެ ތެރޭގައި ރަސްމީ ނަތީޖާ އިޢުލާންކުރާނެކަމަށްވެސް އެ ކޯލިޝަނުން ބުންޏެވެ.