މިހާރު ކުރިޔަށްދާ އޭޝިއަން ކަޕްގެ ގްރޫޕް ސްޓޭޖުގެ މެޗުތައް އިއްޔެ ނިމިފައިވާއިރު، ނޮކްއައުޓް ބުރުގައި ވާދަކުރާ ހުރިހާ ޓީމުތަކާއި، މެޗުތައް މިވަނީ ކަނޑައެޅިފައެވެ.

އެގޮތުން އޭޝިއާ ޕެސިފިކްގެ ގަދަބާރުތައް ކަމުގައިވާ އޮސްޓްރޭލިއާ، ޖަޕާން އަދި ސައުތު ކޮރެއާއިން މި ބުރުގެ ޖާގަތައް ކަށަވަރުކުރިއިރު، މެދުއިރުމަތީގެ އެންމެ ފުންނާބު އުސް ޓީމުތައް ކަމުގައިވާ ސައުދީ އަރަބިއްޔާ އަދި މުބާރާތުގެ އެންމެ ފަހުގެ ޗެމްޕިއަން، ގަތަރު ވެސް ވަނީ އެ ޓީމުތައް ހިމެނޭ ގްރޫޕްގެ އެއްވަނަ ހޯދާ، ނޮކްއައުޓް ބުރަށް ކޮލިފައިވެފައެވެ.

ނޮކްއައުޓް ބުރުގައި ފެނިގެންދާނެ އޭޝިއާ ޕެސިފިކާއި މެދުއިރުމަތީގެ އެންމެ ވަރުގަދަ ކުރިމަތިލުމަކަށްވާނީ، ޖެނުއަރީ 30 ވަނަ ދުވަހު ސައުދީ އަރަބިއްޔާއާއި ސައުތު ކޮރެއާ ބައްދަލުކުރާމެޗެވެ. ސައުތު ކޮރެއާ ނޮކްއައުޓް ބުރުން ޖާގަ ހޯދީ ގްރޫޕް-އީގެ ދެވަނަ ޓީމުގެ ގޮތުގައެވެ. ފުރަތަމަ މެޗުގައި އެ ގްރޫޕުގެ އެއްވަނަ ހޯދި ބަހްރެއިން 3-1 އިން ބަލިކުރި ނަމަވެސް، މެލޭޝިއާއާއި ޖޯޑަން މެޗުން އެ ޓީމު ވަނީ އެއްވަރު ވެފައެވެ.

ގްރޫޕް ސްޓޭޖުގައި އޮމާން އާއި ކިރިގިސްތާން ބަލިކޮށް، އަދި ތައިލެންޑު މެޗުން އެއްވަރުވެ ލިބުނު 7 ޕޮއިންޓާއެކު، ސައުދީ ކޮލިފައިވީ ގްރޫޕް-އެފްގެ އެއްވަނަ ޓީމުގެ ގޮތުގައެވެ.

ރައުންޑް-އޮފް-ސިކްސްޓީންގެ މެޗުތައް ޖެނުއަރީ 28 ގައި ފެށުމަށް ހަމަޖެހިފައިވާއިރު، އެ ދުވަހު ކުޅޭނީ އޮސްޓްރޭލިއާ އާއި އިންޑޮނޭޝިއާ ބައްދަލުކުރާ މެޗާއި، ތަޖިކިސްތާނާއި ޔޫއޭއީ ބައްދަލުކުރާ މެޗެވެ.

ޖެނުއަރީ 29 އާއި 30 ގައި ކުޅޭނީ އިރާގާއި ޖޯޑަން އަދި ގަތަރާއި ފަލަސްތީން ބައްދަލުކުރާ މެޗާއި، އުސްބަކިސްތާނާއި ތައިލެންޑް އަދި ސައުދީ އަރަބިއްޔާ އާއި ސައުތުކޮރެއާ ބައްދަލުކުރާ މެޗެވެ. ޖެނުއަރީ މަހުގެ 31 ގައި އޮންނާނީ ބަހުރެއިނާއި ޖަޕާން އަދި އިރާނާއި ސީރިއާ ބައްދަލުކުރާ މެޗެވެ. 

މުބާރާތުގެ ފައިނަލް ކުޅުމަށް ހަމަޖެހިފައިވަނީ ފެބުރުވަރީ 10 ގައެވެ.