ފުޓުބޯޅަ ސީޒަން ނިމޭއިރު ބާސެލޯނާއަށް ވާދަވެރި އަދި މުބާރާތްތައް ކާމިޔާބު ކުރެވޭނެ ފެންވަރުގެ ކުޅުމެއް ނުދެއްކޭނަމަ، އެ ޓީމުގެ ކޯޗުގެ މަގާމުން އިސްތިއުފާ ދޭނެކަމަށް ޒަވީ ހެނާންޑޭޒް ބުނެފިއެވެ. އޭނާ މިހެން ބުނީ ބުދަ ދުވަހުގެރޭ ކުޅުނު ކޮޕަ-ޑެލް-ރޭގެ ކުއާޓާފައިނަލްގައި އެތުލެޓިކް ކްލަބް އަތުން ބަލިވެ، ބާސެލޯނާ މުބާރާތުން އަލްވަދާއު ކިއުމާއި ގުޅިގެންނެވެ.

ކޮޕަ-ޑެލް-ރޭގެ ކުއާޓާފައިނަލް މެޗުގައި އެތުލެޓިކް ކްލަބް އަތުން ބާސެލޯނާ ބަލިވެފައިވަނީ 4-2 އިންނެވެ. މެޗުގެ ފުރަތަމަ ހާފު ބާސެލޯނާއިން ނިންމާލީ 2-1 ން ލީޑުގައި އޮވެއެވެ. ނަމަވެސް ދެވަނަ ހާފުގައި އިދިކޮޅު ޓީމުން ކާމިޔާބުކުރި ގޯލަކުން މެޗުގެ ނަތީޖާ ހަމަހަމަވެ، މޮޅުވާ ޓީމެއް ކަނޑައެޅުމަށް އިތުރު ވަގުތުގެ ދެ ހާފު ކުޅެން ޖެހުނެވެ. އެތުލެޓިކް ކްލަބުގެ ކޮޅަށް އެ ޓީމުން މެޗު އަނބުރާލީ އިތުރު ވަގުތުގައި އެ ޓީމަށް ކުޅޭ ދެބެއިން ކަމަށްވާ އިނާކީ އަދި ނިކޯ ވިލިއަމްސް ކާމިޔާބުކުރި ގޯލުތަކުންނެވެ. 

މި ބައްޔާއެކީ، ޒަވީގެ ކުރިމަގާ ގުޅޭގޮތުން ގިނަ ބަޔަކު ސުވާލު އުފައްދަން ފެށިއެވެ. ސަބަބަކީ މި ސީޒަންގައި ދެން އެ ޓީމަށް ހަމައެކަނި ވާދަކުރެވޭނީ ލީގު ތައްޓަށާއި ޗެމްޕިއަންސް ލީގަށްކަމަށްވެފައި، ލީގުގެ އެއްވަނައިގައި އޮތް ޖިރޯނާއާ 8 ޕޮއިންޓުގެ ފަރަގެއް އޮތުމުން، ލީގު ކާމިޔާބު ކުރުމަކީ ވެސް ވުމަށް ވުރެން ނުވުން ގާތްކަމެއްކަމަށް ބެލެވޭތީއެވެ.

ކޮޕަ-ޑެލް-ރޭ މެޗަށްފަހު ނޫސްވެރިންނާ ވާހަކަދައްކަމުން ޒަވީ ބުނީ، ސީޒަން ނިމޭއިރު ބާސެލޯނާގެ ފޯމަށް ބަލާފައި އޭނާ އިސްތިއުފާ ދޭން ޖެހޭނެކަމަށް ގަބޫލުކުރާކަމަށާއި، އޭނާގެ މަގާމުގައި ކޮންމެ މީހަކު ހުއްޓަސް ކަން ކުރަން ޖެހޭނެ ގޮތަކީ އެއީ ކަމަށެވެ. ސަބަބަކީ ބާސެލޯނާއަކީ ބޮޑު ކްލަބަކަށްވެފައި، އެ ކްލަބުވާންޖެހޭނީ މުބާރާތްތައް ކާމިޔާބު ކުރެވޭ، ނުވަތަ އެކަމަށް ވާދަކުރެވޭ ފެންވަރުގެ ޓީމަކަށް ކަމަށް އޭނާ ބުންޏެވެ. އެ ފެންވަރަށް ޓީމު ނުގެންދެވޭނަމަ، އެ ޓީމުގެ ކޯޗެއްގެ މަގާމު ފުރުމުގެ ގާބިލުކަން އެމީހެއްގެ ކިބައިގައި ނެތީކަމުގައި ވެސް އޭނާ ބުންޏެވެ.

ބާސެލޯނާގެ ކޯޗުގެ މަގާމަށް ޒަވީ އައްޔަންކުރީ 6 ނޮވެމްބަރު 2021 ގައި ރޮނާލްޑް ކޯމަންގެ ބަދަލުގައެވެ. މި މަގާމާއި ހަވާލުވި ފަހުން މިދިޔަ އަހަރު އޭނާ ވަނީ ބާސެލޯނާއާއެކު ދެ ތައްޓެއް ކާމިޔާބުކޮށްފައެވެ. އެއީ ރިއާލް މެޑްރިޑް 3-1 އިން ބަލިކޮށް ކާމިޔާބުކުރި ސްޕެނިޝް ސުޕަ ކަޕާއި، މިދިޔަ ސީޒަންގެ ލީގު ތައްޓެވެ.