ރައީސުލްޖުމްހޫރިއްޔާ، ޑރ މުޙައްމަދު މުއިއްޒުގެ 7 ދުވަހުގެ ޗައިނާ ދަތުރުފުޅަށް 2.4 މިލިޔަން ރުފިޔާ ޚަރަދުވިކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.

ރައީސުލްޖުމްހޫރިއްޔާގެ އޮފީހުން ވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރެއްވި، ފުރަމާނަ ދަތުރުފުޅުގެ ޖުމުލަ ޚަރަދު ތަފްސީލް މިއަދު މީޑިއާއަށް ހާމަކޮށްފައެވެ.

ރައީސުލްޖުމްހޫރިއްޔާ އާއި އެމަނިކުފާނުގެ ނައިބު ކުރައްވާ ދަތުރުފުޅުތަކުގެ ޚަރަދު ތަފްސީލް ދަތުރުފުޅު ނިމޭތާ 14 ދުވަހުގެ ތެރޭގައި ހާމަކުރެއްވުމަކީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދެކެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައވާ ތަފާސް ހިސާބުގައި ވާގޮތުން އެންމެ ބޮޑު ޚަރަދެއް ހިނގީ ޓިކެޓްގަތުމަށެވެ. މިގޮތުން، 59 ޓިކެޓަށް 2.02 މިލިޔަން ރުފިޔާ ޚަރަދުވިއެވެ.

މީގެ އިތުރުން ދެން އެންމެ ބޮޑު ޚަރަދެއް ހިނގާފައި ވަނީ ދަތުރުގައި ބައިވެރިވި ބޭފުޅުންނަށްދިން ޕޮކެޓް މަނީއަށެވެ. ޕޮކެޓްމަނީގެ ގޮތުަގައި 30 މީހުންނަށް ބޮލަކަށް ދިހަހާސް ރުފިޔާ ޖެހޭ އިރު، ޕޮކެޓްމަނީގެ ގޮތުގައި 3 ލައްކަ ރުފިޔާ ވަނީ ޚަރަދުކޮށްފައެވެ. މުޅި ދަތުރުގެ ޚަރަދަށް ބަލާއިރު 7 ދުވަހުގެ ޚަރަދު ބޮލަކަށް 80000 ރުފިޔާއަށް އަރައެވެ.

މިދަތުރުފުޅުގެ އެކަމަޑޭޝަނާއި ޗައިނާގެ އެތެރޭގެ ދަތުރުތައް ހަމަޖައްސައިދީފައި ވަނީ ޗައިނާ ސަރުކާރުންނެވެ.