ރޭލުތަކުގެ ސަލާމަތާއި ރައްކާތެރިކަމަށް ތަޢާރަފްކުރި ކަވާޗް ސިިސްޓަމް މަސައްކަތް ނުކުރީ ކީއްވެތޯ އިންޑިއާގެ އާއްމުރައްޔިތުން ސުވާލު އުފައްދަން ފަށައިފިއެވެ.

ފާއިތުވި ދެ ދަހަރުގެ ތެރޭގައި އިންޑިއާގައި ހިންގި އެންމެ ބޮޑު ރޭލު އެކްސިޑެންޓް ޖޫންމަހުގެ ދެވަނަ ދުވަހު ހިނގީ، އޮޑީޝާގެ ބަލްސޯރުގައެވެ. 3 ރޭލު މުޑިއަރައި ހިނގި އެ އެކްސިޑެންޓްގައި، މަރުވި މީހުންގެ އަދަދު 300އަށް ވުރެ މަތިކަމަށް ކަމާއި ބެހޭ ފަރާތްތަކުން ކުރިން ރިޕޯޓްކުރި ނަމަވެސް މަރުވި މީހުންގެ އަދަދު މިހާރު ވަނީ، 270އަށް ދަށްކޮށްފައެވެ. އެހެން ނަމަވެސް އެހާދިސާގައި ޒަޚަމްވި މީހުންގެ އަދަދު 1100އަށް ވުރެ ގިނަ ކަމުގައި އިންޑިއާގެ ނޫސްތަކުން ބުނެއެވެ.

މި ރޭލު އެކްސިޑެންޓް ހިނގާފައި ވަނީ، ފަސިންޖަރުން އުފުލާ ރޭލެއް، މުދާ އުފުލާ ރޭލެއްގައި ޖެހި މުޑިއަރައި، އެވަގުތު އެ ޕްލެޓްފޯމުގެ ޖެހިގެން އޮތް ޓްރެކުން ދަތުރުކުރަމުން ދިޔަ ރޭލެއްގައި ޖެހިގެންނެވެ. ދެރޭލުގައި ތިބި މީހުންގެ އަދަދު 2500 ވުރެ ގިނަ ކަމުގައިވެސް ނޫސްތަކުން ރިޕޯޓްކޮށްފައި ވެއެވެ.

Advertisement

މިއެކްސިޑެންޓް ހިނގަން ދިމާވީ، އިލެކްޓްރިކް ސިގްނަލް ސިސްޓަމަށް ދިމާވި މައްސަލައަކުން ކަމަށް ބެލެވޭކަމަށް އިންޑިއާގެ ކަމާއި ބެހޭ ފަރާތްތަކުން ބުނެފައި ވާއިރު، އެކްސިޑެންޓާއި ގުޅިގެން އާއްމުން ވަނީ ގިނަ ސުވާލުތަކެއް ކުރިމަތިކޮށްފައެވެ.

މިގޮތުން އާއްމުން އުފައްދާ އެންމެ މުހިއްމު ސުވާލަކީ، ރޭލުތައް މުޑިއެރުން ހުއްޓުވުމަށް ބޭނުން ކުރުމަށް މޯދީގެ ފޮޓޯފުޅުޖަހައިގެން އިޢުލާނުކުރި ކަވަޗް ސިސްޓަމް ކޮބައިތޯއެވެ.

އިންޑިއާގެ އިންޖިނޭރުން އުފައްދާފައިވާ އަދި ހަމައެކަނި އިންޑިއާގައި ބޭނުންކުރާ ކަވާޗް ސިސްޓަމް އިފްތިތާހްކުރި ދުވަހު، އިންޑިއާގެ ރޭލްވޭ މިނިސްޓަރު ވިދާޅުވީ، ކަވަޗް ސިސްޓަމަކީ، ރޭލު އެކްސިޑެންޓްތައް ހުއްޓުވައިދޭނެ އޮޓަމެޓިކް ބްރޭކް ސިސްޓަމެއް ކަމަށެވެ. މިގޮތުން އެ ޓްރެކްގައި ދެ ރޭލެއް ގާތްވަމުން އަންނަ ނަމަ، ޑްރައިވަރު ބްރެކި ނުޖެއްސިޔަސް ކަވާޗް ސިސްޓަމުން އޮޓެމަޓިކްއިން ބުރެކި ޖައްސައި ރޭލުގެ ދުވެލި ހުއްޓުވާނެ ކަމުގައި އޭނާ ވިދާޅުވެފައިވެއެވެ.

އިންޑިއާގެ އާއްމުން ދަނީ ތިން ރޭލެއް ޖެހި އެކްސިޑެންޓްވި އިރު، އެއްވެސް ރޭލެއްގެ ކަވަޗް ސިސްޓަމް މަސައްކަތް ނުކުރީ ކީއްވެތޯ ސުވާލު އުފައްދާފައެވެ. އަދި ކަވަޗް ސިސްޓަމަކީ، ވުޖޫދުގައިވެސް ނެތް އެއްޗެއްތޯ އަދި އެއީ އޮޅުވާލުމެއްތޯވެސް ބައެއް ފަރާތްތަކުން ސުވާލު އުފައްދާފައިވެއެވެ.