ކުރިއަށް އޮތް 6 މަސްދުވަހުގެ ތެރޭގައި މާލެ ސިޓީގައި އެއްގަމު އުޅަނދު ރަޖިސްޓަރީކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތާއި ގުޅޭގޮތުން ގޮތެއް ނިންމަވާނެކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ. އާޒިމް މިހެން ވިދާޅުވީ މާލެ ސިޓީގެ މޭޔަރުކަމުގެ މަޤާމާއި ހަވާލުވެވަޑައިގަތުމަށްފަހު ބޭއްވެވި ފުރަތަމަ ނޫސްވެރިންގެ ބައްދަލުވުމުގައެވެ.

މާލެ ސިޓީގެ މޭޔަރ އާޒިމް ވިދާޅުވީ މާލޭގައި ދުއްވާ ވެހިކަލްގެ އަދަދު ކަނޑައެޅުމަށް ކުރަންޖެހޭ މަސައްކަތްތަކުގެ މަޝްވަރާގެ މަސައްކަތް މިހާރުވެސް ޓްރާންސްޕޯޓް މިނިސްޓްރީއާއެކު ފައްޓަވާފައިވާކަމަށެވެ. އާޒިމް ވިދާޅުވީ ވެހިކަލް ރަޖިސްޓްރީކޮށްދޭނެ އަދަދެއް ކަނޑަނާޅާ މަގުތައް ތޮއްޖެހުމުގެ މައްސަލަ ހައްލުނުވާނެކަމަށެވެ.

"ކުރިއަށް އޮތް 6 މަސް ތެރޭގައި، ވެހިކަލް ލިމިޓްކުރުމުގެ މައްސަލައިގައި ގޮތެއް ނިންމާނަން. މިއީ ވަރަށް މުހިންމު ކަމެއް." އާޒިމް ވިދާޅުވިއެވެ.

އާޒިމް ވިދާޅުވީ މާލޭގެ މަގުތަކުގައި ހުރި ބޭނުން ނުކުރާ ވެހިކަލްތަކާމެދު ޢަމަލުކުރާނެގޮތެއްވެސް ކަމާބެހޭ ފަރާތްތަކާއި މަޝްވަރާކުރައްވައިގެން ހޯދާނެކަމަށެވެ. މީގެއިތުރުން ސިޓީ ކައުންސިލުން ޕާކުކުރުމަށް ޖާގަ ދޫކޮށްފައިވާ ގޮތުގެ އުސޫލުތައް މުރާޖައާކޮށް، މާލޭގެ މަގުތަކަށް އެންމެ ލުއިވާނެގޮތަށް އެމައްސަލަތަކަށް ޙައްލު ހޯއްދެއްވުމަށްވެސް މަސައްކަތް ކުރައްވާނެކަމަށެވެ.

މީގެއިތުރުން ރަނގަޅު ފެންވަރަކަށް މަގުތައް ހެދި ތަރުތީބުވުމުންވެސް ތޮއްޖެހުމުގެ މައްސަލައަށް ބޮޑު ލުޔެއް ލިބޭނެކަމަށް އާޒިމް ވިދާޅުވިއެވެ.  

އެއްގަމު ދަތުރުފަތުރުގެ ޤާނޫނުގައި އޮންނަގޮތުން ދިވެހިރާއްޖޭގެ ވަކި ރަށެއްގައި ނުވަތަ ސިޓީއެއްގައި ނުވަތަ ސަރަހައްދެއްގައި އެއްގަމު އުޅަނދު ރަޖިސްޓަރީކޮށްދޭނެ އަދަދާއި އުޅަނދު ބޭނުންކުރެވޭނެ މުއްދަތު އެ ރަށެއްގެ ނުވަތަ ސިޓީއެއްގެ ކައުންސިލުން ކަނޑައަޅަންޖެހޭނެއެވެ.