ގަތަރުގައި މިހާރު ކުރިޔަށްދާ އޭޝިއަން ކަޕްގައި އިއްޔެއަކީ ސީރިއާ އާއި ފަލަސްތީނަށް ތާރީހީ ދުވަހެކެވެ. މުބާރާތުގެ ގްރޫޕް ސްޓޭޖުގެ ފަހު ބުރުގައި އިއްޔެ ސީރިޔާ އާއި ފަލަސްތީނުން ގްރޫޕްގެ ފަހު މެޗު ކާމިޔާބުކުރުމުން ލިބުނު 4 ޕޮއިންޓާއެކީ ދެ ޓީމުވެސް މިވަނީ މުޅިން އަލަށް މުބާރާތުގެ "ނޮކް އައުޓް" ބުރަށް ދަތުރުކޮށްފައެވެ.

2015 ވަނަ އަހަރު އޭއެފްސީ ކަޕަށް އަލަށް ކޮލިފައިވި ފަލަސްތީނަށް މުބާރާތުގައި މިހާތަނަށް ކާމިޔާބު ކުރެވުނު ހަމައެކަނި މެޗަކީ އިއްޔެ ހޮންގްކޮންގްއާ ދެކޮޅަށް ކުޅުނު މެޗެވެ. ފަލަސްތީނުން ހޮންކޮންގްގެ މައްޗަށް 3-0 އިން ހޯދި ކާމިޔާބީއާއެކީ، މުބާރާތުގެ "ނޮކް އައުޓް" މެޗަކުން އެ ޓީމު މުޅިން އަލަށް މި ފަހަރު ފެނިގެން ދާނެއެވެ. 

ގްރޫޕްގެ ފަހު މެޗަށް ފަލަސްތީނުން ނިކުތް އިރު، ރައުންޑް-އޮފް-16 އޮތީ ހުވަފެނެއްގެ ތެރޭގައެވެ. ސަބަބަކީ ކުޅުނު ފުރަތަމަ ދެ މެޗުން 1 ޕޮއިންޓު ލިބިފައިވުމެވެ. ނަމަވެސް، ހީކުރެނުގޮތާ ހިލާފަށް ލިބުނު ބޮޑު ކާމިޔާބީއާއެކީ ފަލަސްތީނުގެ ސަޕޯޓަރުންނަށް މިވަނީ އުފާވެރިކަން ގެނަސްދީފައެވެ.

މެޗަށްފަހު ވާހަކަ ދައްކަމުން ފަލަސްތީނުގެ ކެޕްޓަން މުސަބް އަލް ބައްޓާޓް ބުނީ، ޓީމަށް ކުރިމަތިވެފައި އޮތް ގޮންޖެހުންތައް ކިތަންމެ ބޮޑު ނަމަވެސް، އެ ޓީމުން މި ހޯދި ކާމިޔާބާއެކީ ހާމަވެގެން މި ދިޔައީ، ފަލަސްތީނަކީވެސް ކާމިޔާބު ހޯދޭނެ ޓީމެއްކަމަށާއި، ސަރަހައްދީ ފުޓުބޯޅައިގައި އެ ޓީމަކީވެސް ރަގަޅު ކާމިޔާބީތަކެއް ހޯދޭނެ ޓީމެއްކަމެވެ.

ގްރޫޕް-ބީ ގައި ސީރިއާއިން 1-0 އިން އިންޑިއާ ބަލިކުރުމުން ލިބުނު 4 ޕޮއިންޓާއެކީ ގްރޫޕްގެ 3 ވަނަ ލިބުނު ނަމަވެސް، ސީރިޔާ ވެސް ވަނީ "ނޮކް އައުޓް" ބުރުން ޖާގައެއް ކަށަވަރުކޮށްފައެވެ. 

މުބާރާތުގައި ވާދަކުރާ ޓީމުތައް 6 ގްރޫޕަކަށް ބަހާލާފައިވާއިރު ކޮންމެ ގްރޫޕެއްގެ އެއްވަނަ އާއި ދެވަނަ ޓީމުގެ އިތުރުން، ގްރޫޕްތަކުގެ ތިންވަނަ ޓީމުތަކުގެ ތެރެއިން އެންމެ ރަގަޅު ނަތީޖާއެއް ހޯދާ ހަތަރު ޓީމެއް ވެސް "ނޮކް-އައުޓް" ބުރަށް ދަތުރުކުރާނެއެވެ.