ގއ. ވިލިގިލިން ތިން ކުޑަކުއްޖަކަށް ރާއްޖޭގައި ކޮންޓްރޯލްކޮށްފައިވާ ބައްޔެއް ކަމުގައިވާ ހޯއްގޮވާ ކެއްސުން ޖެހިފައިވާ ކަމަށް އެޗްޕީއޭއިން ވިދާޅުވެއްޖެއެވެ.

އެޗްޕީއޭއިން ވިދާޅުވީ، ވެކްސިންގެ ޒަރީއާއިން ރާއްޖޭގައި ކޮންޓްރޯލްކޮށްފައިވާ، ޕާޓުސިސް ނުވަތަ ހޯއްގޮވާ ކެއްސުމުގެ ޕޮޒިޓިވް ކޭސްތަކެއް ފެނުމާއި ގުޅިގެން އަޅަންޖެހެ ފިޔަވަޅުތައް އަޅައި، ކޮންޓެކްޓް ޓްރޭސިންގެ މަސައްކަތް ފަށާފައިވާ ކަމަށެވެ.

މިގޮތުން އައިޖީއެމްއެޗާއި ގއ.އަތޮޅު ހޮސްޕިޓަލް ގުޅިގެން ޚާއްޞަ ޓާސްކް ފޯހެއް އެކުލަވާލައިގެން މިހާރު މަސައްކަތް ކުރަން ފަށާފައިވާ ކަމުގައިވެސް އެޗްޕީއޭއިން ވިދާޅުވިއެވެ. މިގޮތުން ކޮންޓެކްޓް ޓްރޭސިން ހެދުމާއި، މިގޮތުން ބައްޔަށް ޕޮޒިޓިވްވެފައިވާ ފަރާތްތަކާއި ކޮންޓެކްޓް ވެފައިވާ ފަރާތްތަކަށް އެންޓިބަޔޮޓިކް ދިނުމާއި، ބަލީގެ އަލާމާތްތައް ހުރި މީހުން ބައްޔަށް ޓެސްޓްކުރުމާއި، ބަލީގެ އަލާމާތްތައް ހުރި ކޮންޓެކްޓުންގެ ތެރޭގައި ހިމެނޭ މީހުންނަށް ބޭސްދިނުމުގެ މަސައްކަތް މިހާރު ކުރަމުންދާ ކަމުގައިވެސް އެޗްޕީއޭއިން ވިދާޅުވިއެވެ.

އެޗްޕީއޭއިން ވިދާޅުވީ، މިބަލީގެ ނުރައްކާ އެންމެ ބޮޑު ބަޔަކީ، ވަރަށް ތުއްތު ކުދިން ކަމަށެވެ. މިގޮތުން 7 އަހަރުން ދަށުގެ ކުޑަކުދިންގެ ތެރެއިން އެ ވެކްސިން ފުރިހަމަނުކޮށް ތިބި ހުރިހާ ކުޑަކުދިންނަށް ވެކްސިން ދިނުމަށް އެޗްޕީއޭއިންވަނީ އިލްތިމާސްކޮށްފައެވެ.

އަދި ބަލީގެ އަލާމާތެއް ތުއްތުކުދިންނާއި މާބަނޑު މީހުންގެ ކިބައިން އަދި ދާއިމީ ބަލިތަކަށް ބޭސްކުރާ މީހެއްގެ، ކިބައިން ފެނިއްޖެ ނަމަ ލަސްނުކޮށް ސިއްޙީ ޚިދުމަތްތެރިއެއްގެ ލަފާ ހޯދުމަށްވެސް އެޗްޕީއޭއިން ވަނީ އިލްތިމާސްކޮށްފައެވެ.