އަތޮޅުތަކުގެ ރައްޔިތުންނާއި ބައްދަލުކުރެއްވުމުގެ ދަތުރުފުޅުތައް އަންނަ ހަފްތާގައި ފައްޓަވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ އިއުލާނު ކުރައްވައިފިއެވެ.

މާލޭ ސިޓީ ކައުންސިލްގެ މޭޔަރާއި ކައުންސިލް މެމެބަރުން ހުވާކުރެއްވުމަށް ބޭއްވި ރަސްމިއްޔާތުގައި، ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، އަތޮޅުތަކަށް ކުރައްވާ ސިލްސިލާ ދަތުރުފުޅުތައް އަންނަ ހަފްތާގައި ފައްޓަވާނެ ކަމަށެވެ. އަދި މާލޭގެ ރައްޔިތުންނާއި އެކުވެސް ބައްދަލުވުންތައް ބާއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ސަރުކާރުން ކުރާ ކަންކަން ރައްޔިތުންނަށް އޮޅުން ފިލުވައި ދެއްވުމަށްޓަކައި ކޮންމެ ދެ މަހުން އެއް މަހު ވަޒީރުންގެ ފޯރަމް ބާއްވާނެ ކަމަށް ކެމްޕެއިންގައި ވައުދުވެވަޑައިގެންނެވި ގޮތަށް ފުރަތަމަ ފޯރަމްވެސް އަންނަ ހަފްތާގައި ބޭއްވުމަށް ނިންމަވާފައިވާ ކަމަށެވެ.

ރައީސުލްޖުމްހޫރިއްޔާ ވިދާޅުވީ، ޕަބްލިކް ފޯރަމްތަކުަގައި އާއްމުންނަށް ވަޒީރުންނާއި ސުވާލު ކުރެއްވޭނެ ކަމަށާއި، ވަޒީރުންގެ މަޖިލީހުގައި ހިމެނޭ ފަސް ބޭފުޅަކު އެބައްދަލުވުމުގައި ބައިވެރިވެވަޑައިގަންނަވާނެ ކަމަށެވެ. އަދި އެގޮތަށް ކޮންމެ ދެމަހަކުން އެއްމަހު ވަޒީރުންނާއި އެކު ސިލްސިލާ ގޮތެއްގައި ޕަބްލިކް ފޯރަމްތައް ބާއްވަމުން ގެންދާނެ ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އަތޮޅުތަކަށް ދަތުރުފުޅު ފައްޓަވާއިރު އެންމެ ފުރަތަމަ ވަޑައިގަންނަވާނީ އެމަނިކުފާނަށް އެންމެ މަތީ އަޣުލަބިއްޔަތު ލިބުނު ރަށަށް ކަމުަގައި މަޤާމުގެ ހުވާކުރެއްވުމުގެ ކުރިން އެމަނިކުފާނު ވިދާޅުވެފައިވެއެވެ. އެގޮތުން އެމަނިކުފާނު އެންމެ ފުރަތަމަވަޑައިގަންނަވާނެ ރަށަކަށް ވެގެންދާނީ، އެމަނިކުފާނަށް އެންމެ މަތީ އިންސައްތަ ވޯޓު ލިބުނު ކޮޅުމަޑުލު ގުރައިދޫއަށް ކަމުަގައިވެސް ވިދާޅުވެފައިވެއެވެ.

ރައީސުލްޖުމްހޫރިއްޔާ އަންނަ ހަފްތާގައި އަތޮޅުތަކަށް ދަތުރުފުޅުތައް ފައްޓަވާނެކަން އިއުލާނު ކުރެއްވި ނަމަވެސް އެދަތުރުފުޅުތަކާއިގުޅޭ ތަފްސީލް ސަރުކާރުން އަދި ހާމައެއް ނުކުރެއެވެ.