ލޯތްބާއި އޯގާތެރި ކަމުގެ މުޖުތަމައެއް ބިނާކުރުމަށް އެންމެ ގުޅިގެން މަސައްކަތްކޮށްދެއްވުމަށް އައު މޭޔަރު އާދަމް އާޒިމް އެދިވަޑައިގެންފިއެވެ.

އާޒިމް މިހެން ވިދާޅުވީ، މަޤާމުގެ ހުވާކުރައްވައި މަސްޢޫލިއްޔަތާއި ޒިންމާތަކާއި ހަވާލުވެވަޑައިގެންނެވުމަށްފަހު، މިރޭ ވާހަކަފުޅު ދައްކަވަމުންނެވެ.

އާޒިމް ވިދާޅުވީ، ރައްޔިތުންނަށް ދިމާވެފައިވާ ކަންކަން ހައްލުކޮށްދެވޭނީ ސަރުކާރާއި މުއައްސަސާތަކުގެ ފުރިހަމަ އެއްބާރުލުމާއެކުގައި ކަމަށާއި، ސިޓީ ކައުންސިލަށް ސަރުކާރުގެ ފުރިހަމަ އެއްބާރުލުން ލިބޭނެ ކަމަށް އޭނާ ޔަޤީން ކުރައްވާ ކަމަށެވެ. އަދި ލާމަރުކަޒީ ނިޒާމް ތަރުތީބުވެ ހިނގަމުންދަނީ، މަރުކަޒީ ސަރުކާރުގެ އެއްބާރުލުމާއި އެހީތެރިކަން ލިބިގެން ހިންގޭނެ ނިޒާމެއްގެ ގޮތުގައި ކަންވެސް އާޒިމްގެ ވާހަކަފުޅުގައި ފާހަގަކުރެއްވިއެވެ.

އާޒިމްގެ ވާހަކަފުޅުގައި އެމަނިކުފާނަށް އިތުބާރު ކުރައްވައި، މާލޭގެ މޭޔަރުކަމުގެ މަޤާމަށް އިންތިޚާބުކޮށްދެއްވީތީ މާލޭގެ ރައްޔިތުންނަށް ޝުކުރު އަދާކުރެއްވިއެވެ.

އާދަމް އާޒިމްގެ ކެމްޕޭނުގައި މައިގަނޑު ގޮތެއްގައި ވެވަޑައިގެންނެވި އެންމެ ބޮޑު އެއްވަޢުދަކީ، މާލެއަކީ މާލޭގެ ރައްޔިތުން ދިރިއުޅޭ ހިތުން އުޅޭ ފަދަ ތަނަކަށް މާލެ ހައްދަވައިދެއްވުމެވެ.