ޖެނުއަރީ 13 ވަނަ ދުވަހު ބޭއްވި، މާލޭ ސިޓީ ގެ މޭޔަރު އިންތިޚާބުގެ ބައި އިލެކްޝަން ކާމިޔާބު ކުރެއްވި، އެމްޑީޕީގެ ކެންޑިޑޭޓް އާދަމް އާޒިމް މޭޔަރުކަމުގެ ހުވާކުރައްވައި، މަޤާމުގެ މަސްޢޫލިއްޔަތު ތަކާއި މިރޭ ހަވާލުވެވަޑައިގެންފިއެވެ.

އާޒިމް އާއި މާލޭ ސިޓީ ކައުންސިލަށް މެމްބަރު ހޮވުމަށް ބޭއްވި ބައި އިލެކްޝަން ކާމިޔާބު ކުރެއްވި ތިން ބޭފުޅުންވެސް މިރޭ ވަނީ މަޤާމުގެ ހުވާ ކުރައްވާފައެވެ.

ދަރުބާރުގޭގައި މިރޭ ބޭއްވި ރަސްމިއްޔާތުގައި މާލޭގެ މޭޔަރަށާއި ކައުންސިލް މެމްބަރުންނަށް ހުވާ ލައިދެއްވީ ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރެވެ.

ކައުންސިލަރުންގެ މަގާމުގެ ހުވާ ކުރެއްވި ބޭފުޅުންނަކީ، ހެންވޭރު ދެކުނު ދާއިރާގެ ކައުންސިލަރު އައިމިނަތު އަހުމަދު ރިޝްފާ އަދި މާފަންނު ދެކުނު ދާއިރާގެ ކައުންސިލަރު ހަސަން ނިޒާމު އެވެ. މިދެބޭފުޅުން އިންތިޚާބު ކާމިޔާބު ކުރެއްވީ ޕީއެންސީގެ ޓިކެޓްގައި ނުކުންނަވައިގެންނެވެ. މެދު ހެންވޭރު ދާއިރާގެ ކައުންސިލަރު އަހުމަދު ރިލުވާން ރަޝީދު އިންތިޚާބު ކާމިޔާބު ކުރެއްވީ އެމްޑީޕީގެ ޓިކެޓްގައި ނިކުންނަވައިގެންނެވެ. އެހެންނަމަވެސް މަޤާމުގެ ހުވާކުރެއްވުމުގެ ކުރިން އޭނާ މިއަދު ވަނީ، އެމްޑީޕީ ދޫކުރައްވައި، ޕީއެންސީއާ ގުޅިވަޑައިގެންފައެވެ.

މަޤާމުގެ ހުވާކުރެއްވުމަށް ފަހު، މާލޭ ސިޓީގެ މޭޔަރު އާދަމް އާޒިމާއި، މާލޭ ސިޓީކައުންސިލްގެ މެމްބަރު ކަމަށް އަލަށް އިންތިޚާބުވި ތިން މެމްބަރުންވެސް ވަނީ މަޤާމުގެ އިޤުރާރުގައި ސޮއެކުރައްވާފައެވެ.

މާލޭ ސިޓީ ކައުންސިލްގައި މޭޔަރާއި އެކު 19 މެމްބަރުން މިދައުރުގައި ތިބި އިރު ސިޓީ ކައުންސިލްގެ މެޖޯރިޓީ އޮތީ ވެރިކަންކުރާ ޕީއެންސީއަށެވެ.