މިހާރު އައިވޮރީ ކޯސްޓްގައި ކުރިޔަށްދާ އެފްރިކަން ކަޕް އޮފް ނޭޝަންސްގައި ގާނާ އާއި އިޖިޕްޓް ބައްދަލުކުރި މެޗުގައި ލިވަޕޫލްގެ ތަރި މުޙައްމަދު ސަލާހްގެ މަސްގަނޑަށް ލިބުނު އަނިޔާއަކާ ގުޅިގެން އެކަމަށް ފަރުވާ ހޯދުމަށް، މުބާރާތުގެ ތެރެއިން އޭނާ އަނބުރާ ލިވަޕޫލަށް ދިއުމަށް ނިންމައިފިއެވެ. 

އަނިޔާއަށް ފަރުވާ ހޯދުމަށް ލިވަޕޫލަށް ދިއުމަކީ އެންމެ ރަގަޅު ގޮތްކަމަށް ލިވަޕޫލުގެ ކޯޗު ޖާގަން ކްލޮޕް ބުނެފައިވާއިރު، އެކަން އިޖިޕްޓުގެ ފުޓުބޯޅަ އެސޯސިއޭޝަނުންވަނީ ކަށަވަރު ކޮށްދީފައެވެ.

ލިވަޕޫލްގެ ކޯޗު އިތުރަށް ފާހަގަކޮށްފައިވާ ގޮތުގައި، އެންމެނަށް ވެސް (ދެ ޓީމުގެ) ފެންނަ އެންމެ ރަގަޅު ގޮތަކީ، ލިވަޕޫލްގެ މެޑިކަލް ޓީމާއެކު ސަލާހްގެ ފަރުވާގެ ކަންކަން ކުރިޔަށް ގެންދިއުމެވެ. އަދި އަނިޔާވި ދުވަހުން ފެށިގެން ލިވަޕޫލްގެ ޑޮކްޓަރާއެކު ސަލާހް ވަނީ ފަރުވާގެ މަޝްވަރާތައް ކުރިޔަށް ގެންގޮސްފައިކަމަށް ކްލޮޕް ފާހަގަކުރިއެވެ. 

އިޖިޕްޓްގެ ފުޓުބޯޅަ އެސޯސިއޭޝަނުން ނެރުނު ބަޔާނެއްގައިވާގޮތުން، ސަލާހް ލިވަޕޫލަށް ދަތުރުކުރާނީ މިރޭގެ މެޗަށް ފަހުއެވެ. އަދި އިޖިޕްޓް ސެމީ ފައިނަލަށް ދަތުރުކޮށްފިނަމަ، އެ މެޗުގައި ސަލާހްއަށް ކުޅެވޭވަރަށް އަނިޔާ ރަގަޅުވާނެކަމަށް އެސޯސިއޭޝަނުން ގަބޫލުކުރާކަމުގައި އެ ބަޔާނުގައި ބުނެފައިވެއެވެ.

އިޖިޕްޓްގެ ފުޓުބޯޅަ އެސޯސިއޭޝަނުގެ މި ބަޔާނާ ގުޅިގެން ކްލޮޕް ބުނެފައިވަނީ، ސަލާހް އަނިޔާއިން ރަގަޅުވެ، އަދި އިޖިޕްޓް ވެސް މުބާރާތުގައި ކުރިޔަށްގޮސްފިނަމަ، އަނބުރާ އެ މުބާރާތައް ސަލާހް ދިއުމުގައި އޭނާގެ އެއްވެސް މައްސަލައެއް ނެތް ކަމަށެވެ.

ސަލާހްއަށް އަނިޔާވެފައި ވަނީ މުބާރާތުގައި އިޖިޕްޓު ކުޅުނު ދެވަނަ މެޗުގައެވެ. އިޖިޕްޓުން މުބާރާތުގައި ކުޅުނު ފުރަތަމަ ދެ މެޗު ވެސް 2-2 އިން އެއްވަރުވެފައިވާއިރު، 2 ޕޮއިންޓާއެކު އެ ޓީމު އޮތީ ގްރޫޕްގެ ދެވަނައިފައެވެ. 

އިޖިޕްޓުން ގްރޫޕް ސްޓޭޖުގެ ފަހު މެޗުގައި މިރޭ ގްރޫޕްގެ އެއްވަނައިގައި އޮތް ކޭޕް ވާޑްއާ ދެކޮޅަށް ނިކުންނައިރު، މުބާރާތުގައި ކުރިއަށް ދިއުމަށް މިރޭގެ މެޗު ކާމިޔާބުކުރުން އެ ޓީމަށް ވަރަށް މުހިންމު ވާނެއެވެ.