ވެރިކަން ކުރާ ޕާޓީ ޕީއެންސީގެ މަޖިލިސް ޕްރައިމަރީގައި ވާދަކުރަން ހުށައެޅި އެތައް ކެނޑިޑޭޓުންނަކަށް ޕާޓީގެ ޕްރައިމަރީގައި ވާދަކުރުމަށް ފުރުޞަތު ނުދޭން އެޕާޓީގެ ލީޑަޝިޕުން ނިންމުމުން އެކަން ބޮޑު ހައިޖާނުގަނޑަކަށްވެ ބައެއް މެމްބަރުން ޕީއެންސީގެ އޮފީސް ތެރެއަށް ވަދެ ނުރުން ފާޅުކޮށްފިއެވެ.

ޕީއެންސީގެ މަޖިލިސް ޕްރައިމަރީގައި ވާދަކުރަން ބޭނުންވެ ފޯމް ހުށައެޅި ބައެއް ކެންޑިޑޭޓުންގެ ކެންޑިޑެންސީ ބަލައި ނުގަތުމަށް ނިންމައި، އެކެނޑިޑޭޓުންނަށް، ޕީއެންސީގެ ޗެއާ ޕާސަން ޢަބުދުއްރަހީމް ޢަބުދުﷲ ސޮއިކުރައްވައި މިއަދު ވަނީ ސިޓީ ފޮނުވަން ފައްޓަވާފައެވެ. އެހެން ނަމަވެސް ކެންޑިޑެންސީ ބަލައި ނުގަތުމަށް ނިންމީ ކިތައް މެމްބަރުންގެ ކަމެއް އެޕާޓީން ހާމަކޮށްފައެއް ނުވެއެވެ. ކެންޑިޑެންސީ ބަލައި ނުގަންނަ ކަމުގެ ސިޓީ ލިބުނު ބައެއް މީހުން ވަނީ އާދިއްތަ ދުވަހުގެރޭ، ޕީއެންސީގެ އޮފީހަށް ވަދެ ނުރުހުން ފާޅުކޮށްފައެވެ.

ޕީއެންސީން ބައެއް މެމްބަރުންނަށް މަޖިލިސް ޕްރައިމަރީގައި ވާދަކުރުމުގެ ފުރުޞަތު ނުދޭން ނިންމިކަމަށް ބުނެ ފޮނުވާފައިވާ ސިޓީތަކުގައި ބަޔާންކޮށްފައި ވަނީ، އެކެނޑިޑޭޓުން ޕާޓިއަށް އެކަށީގެންވާ ޚިދުމަތްތަކެއް ކޮށްދެއްވާފައި ނުވާތީ ޝަރުތު ހަމަވާކަމަށް ކަނޑައަޅާފައިވާތީ، ކެންޑިޑެންސީ ބަލައިގަނެވެން ނެތްކަމަށެވެ. މީގެ އިތުރުން ބައެއް ކެންޑިޑޭޓުންގެ ކެންޑިޑެންސީ ބަލައި ނުގަތް ސަބަބަކީ އެ މެމްބަރުން ޕާޓީގެ ތެރޭގައި ފިތުނަވެރިކަން އުފެދޭ ގޮތަށް މަސައްކަތް ކުރައްވާފައިވާތީ ކަމަށްވެސް ބައެއް ސިޓީތަކުގައި ބަޔާންކޮށްފައި ވެއެވެ.

ޕީއެންސީގެ މަޖިލިސް ޕްރައިމަރީގައި ވާދަކުރުމަށް ހުށައެޅި ބައެއް ކެންޑިޑޭޓުންގެ ކެންޑިޑެންސީ ބަލައި ނުގަތުމަށް ޕީއެންސީ މި ނިންމީ މަޖިލިސް ޕްރައިމަރީ 3 ފަަހަރެއްގެ މަތިން ފަސްކުރުމަށް ފަހުގައެވެ. މިހާރު އެޕާޓީން ނިންމާފައި ވަނީ، ޖެނުއަރީ މަހުގެ 27 ވަނަ ދުވަހުގައެވެ.

ޕީއެންސީގެ ބައެއް މެމްބަރުން ތުހުމަތުކޮށްފައިވާ ގޮތުގައި ބައެއް ކެންޑިޑޭޓުންނަށް މަޖިލިސް ޕްރައިމަރީގައި ވާދަކުރުމުގެ ފުރުޞަތު ނުދިނުމަށް، ނިންމާފައި ވަނީ ޕާޓީގެ ޗެއާޕާސަން ޢަބްދުއްރަޙީމް ޢަބުދުﷲ ގެ ނުފޫޒުން ވަކި ބޭފުޅުންތަކަކަށް މަޖިލިސް ޓިކެޓް ދިނުމަށްޓަކައެވެ.

ޕާޓިއަށް އެކަށީގެންވާ ޚިދުމަތްތަކެއް ކޮށްދެއްވާފައި ނުވާތީ ކަމަށް ބުނެ މަޖިލިސް ޕްރައިމަރީގައި ވާދަކުރެއްވުމަށް ހުށައެޅި ބައެއް ކެންޑިޑޭޓުންގެ ކެންޑިޑެންސީ ބަލައި ނުގަތުމަށް ނިންމި އިރު އެޕާޓިގެ މެމްބަރުންގެ ގޮތުގައި މިހާރު ތިބި %92 މެމްބަރުންނަކީ، ފާއިތުވި 2 މަސްދުވަހުގެ ތެރޭގައި ޕާޓީއާ އަލަށް ގުޅުނު މެމްބަރުންނެވެ. ރިޔާސީ އިންތިޚާބު ކާމިޔާބު ކުރިފަހުން އެޕާޓީއާ 37000 ވުރެ ގިނަ މީހުން ގުޅިފައިވާ ކަމަށް އެޕާޓިން ބުނާއިރު، ރިޔާސީ އިންތިޚާބު ކާމިޔާބު ކުރެވުނު އެޕާޓީގައި 4000 މެމްބަރުންވެސް ހަމަ ނުވެއެވެ.