ގަން ރީޖަނަލް ހޮސްޕިޓަލުގައި ވިހޭ ޒުވާން އަންހެނަކު ހޮސްޕިޓަލުގައި އޮއްވައި އިންފުލުއެންޒާ ޖެހި އިތުރު ފަރުވާއަށް މާލެ ގެނެސް ފަރުވާދެމުން ދަނިކޮށް މިއަދު ނިޔާވެއްޖެއެވެ.

މިއަދު ނިޔާވެފައި ވަނީ އުމުރުން 35 އަހަރުގެ ދިވެހި އަންހެނެކެވެ. މައުލޫމާތު އެނގޭ މީހަކު ބުނިގޮތުގައި އަންހެން މީހާ މަރުވި ސަބަބު ކަމަށް މަރު ފޯމުގައި ބަޔާންކޮށްފައި އޮތީ، އިންފުލުއެންޒާ ޖެހުމެވެ.

ނިޔާވި އަންހެންމީހާގެ ފިރިމީހާގެ އާއިލާގެ މީހަކު ބުނި ގޮތުގައި ނިޔާވި އަންހެން މީހާއަށް އިންފުލުއެންޒާ ޖެހުނީ ވިހައިގެން ހޮސްޕިޓަލުގައި އޮއްވައެެވެ. އަދި މިދިޔަ ހަފްތާގައި އެ އަންހެންމީހާ ގަންރީޖަނަލް ހޮސްޕިޓަލުން މާލެ ފޮނުވީވެސް ވެންޓިލޭޓަރުގައި ކަމަށާއި، އަންހެންމީހާއަށް ގަން ރީޖަނަލް ހޮސްޕިޓަލުން އެކަށީގެންވާ ފަރުވާއެއް ދެވުނު ކަމަށް އާއިލާއަށް ޤަބޫލު ނުކުރެވޭ ކަމުގައިވެސް އޭނާ ބުންޏެވެ.

ނިޔާވި އަންހެންމީހާ ގެ ދެ ކުދިން ތިބެއެވެ.

މިޖެނުއަރީ މަހުގެ ތެރޭގައި އިންފުލުއެންޒާ ޖެހިގެން އިތުރު މީހަކުވެސް މަރުވެފައިވާ ކަން، ނޭވާލާ ނިޒާމްގެ ބަލިތަކުގެ ޚާއްސަ ޑޮކްޓަރު، ޑރ، މުޙައްމަދު އަލީވެސް ހާމަކުރައްވާފައެވެ. އެދުވަހު ޑރ. މުހައްމަދު ޢަލީ ވަނީ 3 މީހަކަށް ވެންޓިލޭޓަރުގައި ފަރުވާދެމުންދާކަންވެސް ހާމަކުރައްވާފައެވެ.

ރާއްޖޭގައި އިންފުލުއެންޒާ ޖެހޭ މީހުންގެ އަދަދު އިތުރުވަމުން އަންނަ ކަމުގައި، މިދިޔަ ހަފްތާގައި އެޗްޕީއޭއިންވެސް ވަނީ ބުނެފައެވެ.