މިއަންނަ މާރިޗު މަހުގެ ތެރޭގައި ރާއްޖޭގައި އެއާ އެމްބިއުލާންސްގެ ޚިދުމަތް ފެށޭނެ ކަމަށް، ރައީސުލްޖުމްހޫރިއްޔާ ވިދާޅުވެފައި ވާއިރު، އެޚިދުމަތް ފެށުމާ ހަމައަށް ރާއްޖޭގައި ލިބެން ހުރި ހުރިހާ ވަސީލަތެއް ބޭނުންޖެހޭ ކޮންމެ ހާލަތެއްގައި ފަސްނުޖެހި ބޭނުންކުރުމަށް އެމްޑީޕީން ސަރުކާރަށް ގޮވާލައިފިއެވެ.

އެމްޑީޕީން ނެރުނު ނޫސްބަޔާނުގައި ބުނެފައި ވަނީ، ގއ. ވިލިނގިލީގައ ސްޓްރޯކެއް ޖެހި ހާލު ދެރަވި 13 އަހަރުގެ ކުޑަކުއްޖެއް ފަރުވާ ދިނުމަށް މާލެ ގެނައުން ސަރުކާރުގެ ސީދާ އިހުމާލުން 16 ގަޑިއިރަށް ވުރެ ލަސްވެ އެ ކުއްޖާގެ ފުރާނަ ގެއްލިފައިވާތީ ދިވެހިރައްޔިތުންގެ ޑިމޮކްރަޓިކް ޕާޓީން އެކަމާއި މެދު ނުހަނު ހިތާމަކުރާ ކަމަށެވެ. އަދި މި ހާދިސާއާ ގުޅިގެން ސަރުކާރުން ނެރުނު ބަޔާނުގައި އިމަޖެންސީގައި ބަލި މީހުން އުފުލޭނެ އިންތިޒާމުތައް ހުރިކަން ކަށަވަރުވާއިރު, އެ ވަސީލަތްތައް ބޭނުން ނުކުރުން މި ޕާޓީން ހަރުކަށި އިބާރާތުން ކުއްވެރި ކުރާ ކަމުގައިވެސް އެމްޑީޕީގެ ބަޔާނުގައި ބުނެފައިވެއެވެ.

މީގެ އިތުރުން، ސަރުކާރުގެ އިސްވެރިން މި ހާދިސާގެ ޒިންމާއިން ރެކި ދައުލަތުގެ ކުންފުނިތައް ބަދުނާމު ކުރާ ކުރުން މި ޕާޓީން ދެކެނީ ފިނޑި އަމަލެއްގެ ގޮތުގައި ކަމަށާއި، މިކަމުގައި ސަރުކާރުގެ އިސްވެރިން ޒިންމާ ނަގައި އާއިލާގެ ފަރާތުން މައާފަށް އެދުމަށްވެސް އެމްޑީޕީން ވަނީ ގޮވާލާފައެވެ.

އެމްޑީ]ީގެ ބަޔާނުގައި ބުނެފައި ވަނީ، މިއީ ދިވެހި ދަރިއެއްގެ ފުރާނައަށް ވުރެ އަމިއްލަ ސިޔާސީ މަސްލަހަތު ސަރުކާރުން އިސްކުރި ދެވަނަ ފަހަރު ކަމަށާއި، ސަރުކާރުން ގޮތްދޫނުކުރުމުގެ އަގަކީ މައުސޫމު ދިވެހި ޅަދަރިންގެ ފުރާނަތައް ގެއްލިގެން ދިޔުންކަމަށް މިއަދު ވެފައިވާ ކަމަށެވެ.

އެމްޑީޕީގެ ބަޔާނުގައި، އިންޑިއާ އިން ހަދިޔާކޮށްފައިވާ ދެ ހެލިކޮޕްޓަރާއި ޑޯނިއާ މަތިންދާ ބޯޓު ފާހަގަކޮށްފައި ނެތަސް އެބަޔާނުގައި އިޝާރާތްކޮށްފައި ވަނީ އެ އުޅަނދުތަކަށެވެ. 2011 ވަނަ އަހަރުން ފެށިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމުގެ ހުވާކުރުމާއި ހަމައަށް ވައިގެމަގުން ބަލި މީހުން އުފުލުމުގައި ބޭނުން ކުރި އެންމެ މުހިއްމު އެއް ވަޞީލަތަކީ ހެލިކޮޕްޓަރެވެ. އަދި ރައީސް ޞާލިޙްގެ ވެރިކަމުގައި އިންޑިއާއިން ރާއްޖެއަށް ހަދިޔާކުރި ޑޯނިއާ މަތިންދާ ބޯޓުވެސް މައިގަނޑުގޮތެއްގައި ބޭނުން ކުރަމުން އައީ، ސިއްޙީ ކުއްލި އެމާޖެންސީ ހާލަތުގައި ބަލި މީހުން އުފުލުމަށާއި، ސާޗު އެންޑް ރެސްކިއު އޮޕަރޭޝަންސް ތަކުގައެވެ. އެހެން ނަމަވެސް އިންޑިއާ ސިފައިން އެއުޅަނދުތައް ދުއްވާތީ، އިންޑިއާ ސިފައިން ރާއްޖެއިން ފޮނުވާލުމުގެ މަސައްކަތް ކުރަމުން އަންނަ މިދަނޑިވަޅުގައި އެއުޅަނދުތައް ބޭނުން ކުރުން ސަރުކާރުން އޮތީ ހުއްޓާލާފައެވެ.