ގއ. ވިލިގިލީ އުމުރުން 13 އަހަރުގެ މުޙައްމަދު ޖާހް ޚާލިދުގެ ބަލިހާލަތު ބޮޑުވެގެން އަވަހަށް މާލެ ގެންދިއުމަށް އެ ރަށުގެ ހޮސްޕިޓަލުގެ ޑޮކްޓަރުން ލަފާދެއްވާފައި ވަނިކޮށް، އެގޮތަށް އަމަލުކުރުން ލަސްކުރުމުގެ ސަބަބުން އެކުއްޖާ ނިޔާވި ހާދިސާގައި އިޙްމާލުވި ފަރާތްތަކާއި މެދު ފިޔަވަޅު އެޅުމަށް ދަ ޑިމޮކްރެޓްސްއިން ގޮވާލައިފިއެވެ.

ރައީސް ނަޝީދަށް ވަފާތެރި ބޭފުޅުންކޮޅެއް ގުޅިގެން އުފައްދާފައިވާ ސިޔާސީ ޕާޓީ، ދަ ޑިމޮކްރެޓްސްއިން ނެރުނު ނޫސްބަޔާނުގައި ބުނީ، އަވަހަށް ފަރުވާލިބެންޖެހޭ ކުއްޖާ އިމަޖެންސީކޮށް އުފުލުމުގައި ކަންހިނގާފައިވާ ގޮތާމެދު ސަރުކާރުން މިހާތަނަށް ހާމަކުރައްވާފައިވާ ވާހަކަތަކުން ވެސް އެކަމުގައި އިހުމާލުވެފައިވާ ކަން އެނގޭ ކަމަށެވެ.

ދަ ޑިމޮކްރެޓްސްއިން ބުނީ، ރާއްޖޭގެ މީހުން ދިރިއުޅޭ އެކި ސަރަހައްއްދުތަކުގައި ސިއްޙީ ހިދުމަތް ފުރިހަމަ ގޮތުގައި އަދި ވެސް ލިބެން ނެތުމާއެކު، ބަލިހާލަތު ބޮޑުވުމުން މާލެ ގެނައުން ލާޒިމުވެފައިވާކަން އަބަދުވެސް އިނގޭއިރު، ބަލިމީހުން އިމެޖެންސީކޮށް އުފުލޭނެ އިންތިޒާމަކީ އެންމެ ޔަގީންކަމާ އެކު ހަމަޖެހިފައި އޮންނަން ޖެހޭނެ ނިޒާމްކަމަށެވެ. އަދި އެންމެ ފަހުން މި ހިނގި ހިތާމަވެރި ހާދިސާއިން އިނގެނީ އެކަން އެހާ އިތުބާރާ އެކު ހަމަޖެހިފައި ނެތްކަންކަމަށާއި، މި ފަހަރު މި ދިމާވި ހާދިސާގައި އިހުމާލުތަކެއް ވާކަން މިހާތަނަށް ސަރުކާރުން ހާމަކުރެއްވި މައުލޫމާތުން އިނގޭތީ، އެކަމުގެ ފުރިހަމަށް ތަހުގީގެއް ހިންގަވައި، އެކަމުގައި އިހުމާލުވި ފަރާތްތައް ޖަވާބުދާރީ ކުރުވުމަށް އެޕާޓީން ގޮވާލާކަމަށެވެ.

އަދި މިފަދަ ހިތާމަވެރި ހާދިސާއެއް ތަކުރާރު ނުވާނެކަން ކަށަވަރު ކުރުމަށްޓަކައި ކަމާ ގުޅުންހުރި އެންމެހާ އިދާރާތަކުގެ ޕްރޮސީޖާތަކާއި، ޕޮލިސީތަކާއި އަދި ގަވާއިދުތަކަށް ގެންނަންޖެހޭ ބަދަލުތައް މިހާރުން މިހާރަށް ގެނައުމަށްވެސް އެޕާޓިން ގޮވާލާކަމުގައި އެބަޔާނުގައި ބުނެފައިވެއެވެ.

ގއ. ވިލިނގިލީ، ޕެންޒީއާގޭ، މުޙައްމަދު ޖާހު ޚާލިދު (13އ) ނިޔާވީ، ސިއްޙީ އެމާޖެންސީ ކުއްލަި ހާލަތުގައި، ގއ. އަތޮޅު ހޮސްޕިޓަލުން، މާލޭގައި ހުންނަ އައިޖީއެމް ހޮސްޕިޓަލަށް ރިފަރ ކުރުމުން، މާލެއަށް ގެނައުން ލަސްވެ އެކަށީގެންވާ ފަރުވާ ނުލިބުމުގެ ސަަބަބުން ކަމުގައި އާއިލާއިން ތުހުމަތުކޮށްފައިވެއެވެ. އަދި އެކުއްޖާ މާލެއަށް ގެނައުމަށް ކުރި މަސައްކަތްތަކުގައި ލަސްވެގެން ދިޔައީ، ކޮމާޝަލް ފްލައިޓެއްގައި ކުއްޖާ މާލެ ގެނައުމަށް މަސައްކަތްކޮށް، އެފްލައިޓަށް ދިމާވި މައްސަލައިގެ ސަބަބުން ކަމަށް އާސަންދަ ކުންފުނިން ބުނެފައިވެއެވެ. އެހެންވެ އަލުން ފްލައިޓެއް ޗާޓަރުކޮށްގެން އެކުއްޖާ ކޫއްޑޫ މަގުން މާލެއަށް ގެނެވުނީ، ހޮސްޕިޓަލުން ކުއްޖާ މާލެއަށް ގެންގޮސްދިނުމަށް އެދުނުތާ 12 ގަޑިއިރާއި 12 މިނިޓްފަހުންނެވެ.