އައްޑޫ ސިޓީ ހިތަދޫގެ ޒޯން ސްޓޭޑިއަމްގެ އާބާތުރަ ފިލުވައި، ސްޓޭޑިއަމްގެ މަރާމާތުގެ މަސައްކަތްތައް އިއްޔެ ފަށައިފިއެވެ. މި މަސައްކަތް ރަސްމީކޮށް ފައްޓަވައިދެއްވީ  އައްޑޫ ސިޓީއަށް ކުރެއްވެވި ދަތުރުފުޅެއްގައި މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން، އޮނަރަބަލް ޢަބްދުﷲ ރާފިޢުއެވެ.

މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގައި މި މަހުގެ 11 ވަނަ ދުވަހު ބޭއްވި ރަސްމިއްޔާތެއްގައި، މި މަސައްކަތް ކުރުމަށް ހަވާލުކޮށްފައިވަނީ ނޫރައްދީން އިންވެސްޓެމެންޓާއެވެ. މި އެއްބަސްވުމުގައި  މިނިސްޓްރީގެ ފަރާތުން ސޮއިކުރެއްވީ، ސްޓޭޓް މިނިސްޓަރ އިބްރާހިމް އާމިރުއެވެ. އަދި ނޫރައްދީން އިންވެސްޓްމަންޓުގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖަރ އަލީ ނޫރައްދީނެވެ.

މި މަސައްކަތް ނޫރައްދީން އިންވެސްޓްމެންޓާއި ހަވާލުކޮށްފައިވަނީ 30 ދުވަހުގެ ތެރޭގައި މަސައްކަތް ނިންމާގޮތަށެވެ. އެގޮތުން ފެބުރުވަރީ 10 ވަނަ ދުވަހަކީ މި މަސައްކަތް ނިންމަންޖެހޭ ދުވަހުވެ. މި މަސައްކަތުގެ އަގަކީ 1،450،000ރ. (އެއް މިލިއަން ހަތަރު ލައްކަ ފަންސާސް ހާސް ރުފިޔާ) އެވެ.

މިނިސްޓްރީ އިން މައުލޫމާތު ހިއްސާފައިވާ ގޮތުގައި ހިތަދޫ ޒޯން ސްޓޭޑިއަމްގެ މަރާމާތުގެ މަސައްކަތް ނިމޭއިރު، އަލުން އެ ދަނޑުގައި މުބާރާތްތައް ކުޅޭވޭ ފެންވަރަށް ތަރައްގީ ކުރެވޭނެއެވެ.

މިނިސްޓަރ ރާފިއު އައްޑޫއަށް ކުރެއްވެވި ދަތުރުފުޅުގައި ވަނީ އައްޑޫ ސިޓީގެ ކުޅިވަރު ކްލަބްތަކުގެ އިސް އޮފިޝަލުންނާއި ވެސް ބައްދަލުކުރައްވާފައެވެ. މި ބައްދަލުކުރެއްވުމުގައި ކްލަބްތަކުގެ ހަރަކާތްތައް ކުރިޔަށްގެންދިޔުމުގައި ކުރިމަތިވެފައިވާ ދަތިތަކާއި ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކުރައްވާފައެވެ.

މިނިސްޓަރ ރާފިއު އައްޑޫ ސިޓީގެ ކުޅިވަރު ކްލަބްތަކުގެ އިސް އޮފިޝަލުންނާއި ބައްދަލުކުރެއްވުން

ރާއްޖޭގެ ކުޅިވަރު ކުޅޭ ތަންތަނަށް ބޭނުންވާ މަރާމާތުތައް ކުރުމަށް އުސޫލުތަކެއް ކަނޑައަޅައި އެކަން ހަރުދަނާ ގޮތެއްގައި ކުރެވޭނެ މަގު ފަހިކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ.