ގއ. ވިލިނގިލި ހޮސްޕިޓަލުން އައިޖީއެމްއެޗަށް ރިފަރކުރި އުމުރުން 13 އަހަރުގެ ކުޑަކުއްޖަކު، ނިޔާވުމާއި ގުޅިގެން، ވީ އެންމެ އަވަހަކަށް ބަލިމީހާ ގެނެސްދިނުމަށް އިސްކަން ދިނުމުގެ އުޞޫލެއް ކަނޑައަޅައި، އެގޮތަށް އަމަލުކުރުމަށް ރައީސުލްޖުމްހޫރިއްޔާ މޯލްޑިވިއަން ހިންގާ އައިއޭއެސްއަށް އަންގަވައިފިއެވެ. 

ރައީސުލްޖުމްހޫރިއްޔާގެ އޮފީހުން ވިދާޅުވީ، ބަލި ޙާލަތެއް މެދުވެރިވެގެން، އިތުރު ފަރުވާ ދިނުމަށް، ވައިގެ މަގުން ބަލި މީހަކު ގެނެސްދޭންޖެހޭ އެއްވެސް ޙާލަތެއްގައި، އާސަންދަ ފަދަ އިދާރާތަކުން ކަންކަން ހަމަޖެހެންދެން މަޑުނުކުރައްވައި، ޞިއްޙީ ފަރުވާދޭ ތަނަކުން އެފަދަ ކަމަކަށް އެދުމާއެކު، ވީ އެންމެ އަވަހަކަށް ބަލިމީހާ ގެނެސްދިނުމަށް އިސްކަން ދިނުމުގެ އުޞޫލެއް ކަނޑައަޅައި، އެގޮތަށް އައިލެންޑް އޭވިއޭޝަނުން އަބަދުވެސް ޢަމަލުކުރަމުން ގެންދެވުމަށް ރައީސުލްޖުމްހޫރިއްޔާ މިއަދު އެދިވަޑަިއިގެންފައި ވާކަމަށެވެ.

އަދި ކުޑަކުއްޖާ ނިޔާވުމާއި ގުޅިގެން ރައީސުލްޖުމްހޫރިއްޔާ ވަނީ އެކުއްޖާގެ އާއިލާއަށް ތަޢުޒިޔާ ފޮނުއްވާފައެވެ.

އާއިލާއިން ތުހުމަތު ކުރާ ގޮތުގައި މިއަދު ކުއްޖާ ނިޔާވީ، ފަރުވާއަށް މާލެ ގެނައުން ލަސްވުމާއި ގުޅިގެންނެވެ. ޖެނުއަރީ 18 ވަނަދުވަހުގެ ރޭ ފަތިހު 5:03ގައި، ގއ. އަތޮޅު ހޮސްޕިޓަލުން އެމާޖެންސީ ކުއްލަި ހާލަތުގައި، އައިޖީއެމްއެޗަށް ރިފަރކުރި ކުޑަކުއްޖާ، އާސަންދަ މެދުވެރިކޮށް މާލެ ގެނެވުނީ، އެދުވަހުގެ ހަވީރު، 17:15 ގައެވެ. އާސަންދަ ކުންފުނިން ހާމަކޮށްފައިވާ ގޮތުގައި ކުއްޖާ މާލެ ގެނައުން ލަސްވެގެން ދިޔައީ ޓެކްނިކަލް މައްސަލައެއް ދިމާވެ، ދެވަނަ ފަހަރަށް ފްލައިޓެއް ޗާޓަރުކޮށް ފޮނުވަން ޖެހުމުގެ ސަބަބުންނެވެ.

ފަރުވާއަށް މާލެ ގެނެވުނުލެއް ލަސްވި، އަދި ފަރުވާ ދެމުން ދަނިކޮށް މިއަދު ނިޔާވި ކުޑަކުއްޖަކީ، ގއ. ވިލިނގިލީ، ޕެންޒީއާގޭ، މުޙައްމަދު ޖާހު ޚާލިދު (13އ)އެވެ.

މީގެ ކުރިން އެމާޖެންސީ ކުއްލި ހާލަތުގައި ބަލި މީހުން އެތަނުން އަނެއްތަނަށް އުފުލަމުން ދަނީ، އިންޑިއާ ސަރުކާރުން ރާއްޖެއަށް ހަދިޔާކޮށްފައިވާ، ޑޯނިއަރ މަތިންދާ ބޯޓާއި، ހެލިކޮޕްޓަރު ތަކުގައެވެ. އެހެން ނަމަވެސް އިންޑިއާ ސިފައިން ރާއްޖެއިން ބޭލުމަށް ސަރުކާރުން ކުރަމުން އަންނަ މަސައްކަތާއި އެކު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމުގެ ހުވާކުރެއްވުމާއި އެކު އެއުޅަނދުތައް ބޭނުންކޮށްގެން ބަލި މީހުން އުފުލުމާއި، ސާރޗް އެންޑް ރެސްކިއު އޮޕަރޭޝަންސްތަކުގައި އެއުޅަނދުތައް ބޭނުން ކުރުން ވަނީ ހުއްޓާލާފައެވެ.