މިއަދު ނިޔާވި، ގއ. ވިލިނގިއްޔަށް ނިސްބަތްވާ އުމުރުން 13 އަހަރުގެ ކުޑަކުއްޖާ އިތުރު ފަރުވާއަށް މާލެ ގެނައުން ލަސްވީ، ފްލައިޓަށް ޓެކްނިކަލް މައްސަލައެއް ދިމާވެ ޕްލޭން ކުރި ގޮތަށް ކަންކަން ނުދިޔުމުން ކަމުގައި އާސަންދަ ކުންފުނިން ބުނެފިއެވެ.

އާސަންދަ ކުންފުނިން މިރޭނެރުނު ބަޔާނެއްގައި ވަނީ، އުމުރުން 13 އަހަރުގެ ކުއްޖާ އިތުރު ފަރުވާއަށް މާލެ ގެނައުމުގެ ކަންކަން ކުރިޔަށް ދިޔަ ގޮތް ހާމަކޮށް ބަޔާނެއް ނެރެފައެވެ.

އެބަޔާނުގައި ބުނެފައި ވަނީ، ގއ. ވިލިނގިލީގައި ހުންނަ، ގއ. އަތޮޅު ހޮސްޕިޓަލްްގައި އޮތް ހާލު ބޮޑު ބަލިކުއްޖަކު މާލެ ފޮނުވުމަށް އެހޮސްޕިޓަލުން އާސަންދަ ކުންފުންޏަށް ރިކުއެސްޓް ކުރީ، ޖެނުއަރީ 18 ވަނަ ދުވަހުގެ ރޭ ފަތިހު 5:03 ގައި ކަމަށެވެ. އެރިކުއެސްޓް ލިބުމުން 12 މިނިޓް ތެރޭގައި ފަތިހު 5:19ގައި ރިކުއެސްޓް އެޕްރޫވްކޮށް އެންމެ އަވަހަށް ފްލައިޓެއް ލިބެން އޮތް ގޮތެއް ބެލި ކަމަށެވެ. މިގޮތުން އެންމެ އަވަހަށްވެސް ކޫއްޑޫއިން މަލެ އަންނަ ފްލައިޓެއް އޮތީ، އޭގެ އަނެއް ދުވަހުގެ ފަތިހު 5:55ގައި ކަމަށްވާތީ، ޝެޑިއުލް ފްލައިޓެއް ހަމަޖެއްސުމުގެ މަސައްކަތް ކުރެވުނު ކަމަށެވެ.

މިގޮތުން އެދުވަހުގެ ހެނދުނު 14:55ގައި ކޫއްޑޫއަށް ޗާޓަރ ފްލައިޓެއް ފޮނުވުމަށް އަދި 16:20 ގައި އެފްލައިޓް މާލެ އާދެވޭނެކަމަށް މޯލްޑިވިއަނުން ޝެޑިއުލް ދީފައި ވަނިކޮށް، އެއަށްވުރެ އަވަހަށް މާލެއިން، ކައްދޫއަށް އަންނަ ޝެޑިއުލް ފްލައިޓްގައި ޖާގަ އޮތް ކަމަށާއި، އެފްލައިޓް ކޫއްޑޫއަށް ޑައިވާޓް ކުރެވިދާނެކަން ކޫއްޑޫ އެއާޕޯޓުން މައުލޫމާތު ދިންކަމަށް އާސަންދަ ކުންފުނިން ބުންޏެވެ. އެހެން ނަމަވެސް އެންމެ ފަހު ވަގުތު ޓެކްނިކަލް މައްސަލައެއް ދިމާވެ، އެގޮތަށް އެދަތުރު ހަމަނުޖެހުމުން، އަނެއްކާ އަލުން ފްލައިޓެއް ޗާޓަރުކޮށްގެން ކޫއްޑޫއިން ބަލިމީހާ މާލެއަށް ގެނެވުނީ، ހަވީރު 17:15 ގައި ކަމަށް އާސަންދައިން ބުންޏެވެ.

އާސަންދައި ނެރުނު ބަޔާނުގައިވާ މައުލޫމާތަށް ބަލާއިރުވެސް، 13 އަހަރުގެ ކުޑަ ފިރިހެންކުއްޖާ އިތުރުފަރުވާއަށް މާލެ ގެނައުމަށް 12 ގަޑިއިރާއި 12 މިނިޓް ހޭދަވިއެވެ.

އާއިލާއިން ތުހުމަތު ކޮށްފައިވާ ގޮތުގައި ކުއްޖާ ނިޔާވީ އިތުރު ފަރުވާއަށް މާލެ ގެނައުން ލަސްވުމުގެ ސަބަބުންނެވެ. ނިޔާވި ކުއްޖާގެ ޖަނާޒާ މިރޭގެ މަޣުރިބު ނަމާދަށް ފަހުގައި ވަނީ، ހުޅުމާލެ ސަހަރާގައި ބާއްވާފައެވެ.

އާސަންދަ ކުންފުނިން ނެރުނު ބަޔާނުގައި ވަނީ، ނިޔާވި ކުޑަކުއްޖާގެ އާއިލާއަށް ތަޢުޒިޔާ ފޮނުވާފައެވެ.