ވާރޭ ވެހި ހުޅުމާލެ ސަހަރާގައި ފެންބޮޑުވެ، މީހުން ވަޅު ނުލެވޭ މައްސަލަ ހައްލު ކުރުމަށް ދޮޅުފޫޓަށް ވެލި އަޅައި، ޑްރެއިން ސިސްޓަމެއް ގާއިމްކުރަން މާލެ ސިޓީ ކައުންސިލުން ނިންމައިފިއެވެ.

މާލެ އަށް ކުރި ވިއްސާރައިގައި ހުޅުމާލެ ސަހަރާގެ ބިމު އަޑިން ފެންގަނޑު ނުހިނދޭތީ، އެ ތަނުގައި މީހުން ވަޅުލުން ވަގުތީ ގޮތުން މެދުކަނޑާލައި، މާލޭގެ އާ ސަރަހަރާގައި މީހުން ވަޅުލުން ދެ ފަހަރަށް ބަދަލުކުރިއެވެ.

މާލެ ސިޓީ ކައުންސިލް ބައްދަލުވުމުގައި އެ މައްސަލަ އަށް ހައްލު ހޯދައިދިނުމަށް އެދިވަޑައިގެން ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ހުށަހެޅުއްވިއެވެ. އޭނާ ހުށައެޅުއްވީ ހުޅުމާލެ ސަހަރާގައި ފެންބޮޑުވާ މައްސަލަ ހައްލުކުރުމަށް ފެން ހިންދާ ނިޒާމެއް ގާއިމުކުރުމަށެވެ.

އެ މައްސަލަ ހައްލު ކުރަން މައްޗަންގޮޅި މެދު ދާއިރާގެ ކައުންސިލަރު އަހުމަދު ޒަމީރު ހުށަހެޅުއްވީ ސަހަރާ އަށް ދޮޅުފޫޓަށް ވެލިއެޅުމަށެވެ.

ހިނަވާ ކަށުނަމާދަށްފަހު، ވަޅުލުމަށް މާލެ ގެންދަންޖެހުމުގެ ދަތިކަން އާއިލާއާއި ޚިދުމަތް ދޭން ތިބޭ ފަރާތްތަކަށްވެސް ކުރިމަތިވެއެވެ. ބައްދަލުވުމުގައި އިތުރަށް ހުށައެޅީ މޫނު ބެލުމާއި ކަށުނަމާދަށް ފުރޮޅުލީ ގޮނޑީގައި އަންނަ މީހުންނަށް ފަސޭހައިން ބައިވެރިވެވޭގޮތަށް، ވީލް ޗެއަރ އެކްސެސް ޤާއިމުކުރުމަށެވެ.

ސަހަރާގައި އަންހެނުން އަދި ފިރިހެނުންނަށް ޚާއްސަ ފާޚާނާ ބަރިއެއް ހެދުމަށް މީގެކުރިންވެސް ދެފަހަރެއްގެމަތިން ބިޑަށް ހުޅުވާލިއެވެ. ނަމަވެސް ހުށައަޅާ ބިޑްތައް ބޮޑުވުމުގެ ސަބަބުން އެ މަސައްކަތް ކުރިއަށްގެންގޮސްފައެއް ނުވެއެވެ. އަދި މިހާރު މިވަނީ، ފާޚާނާ ބަރީގެ އިތުރުން، މެންބަރުން ހުށައެޅި އިތުރު ޚިޔާލުތަކާއެކު ހުޅުމާލެ ސަހަރާގެ ޚިދުމަތްތައް ފަސޭހަކުރުމަށް އެ މަޝްރޫޢުގެ އަލުން ކުރިއަށްގެންދިއުމަށް ނިންމާފައެވެ. މި ބަދަލު ފާސްކޮށްފައިވަނީ ބައްދަލުވުމުގައި ބައިވެރިވި 10 މެންބަރުންގެ ފުރިހަމަ ތާޢީދާއެކުއެވެ.