މަދަނީ މައްސަލަތަކުގައި ވަކީލަކު އައްޔަނުކުރުމުގެ ޤާބިލްކަން ލިބިފައިނުވާ ފަރާތްތަަކަށްވެސް ޤާނޫނީ އެހީތެރިކަން ފޯރުކޮށްދެވޭނެ ދެމެހެއްޓެނިވި ނިޒާމެއް އޮތުމަކީ މުހިއްމު ކަމެއް ކަމުގައި އުއްތަމަ ފަނޑިޔާރު އަޙްމަދު މުޢުތަސިމް އަދުނާން ވިދާޅުވެއްޖެއެވެ.

އުއްތަމަ ފަނޑިޔާރު އަޙްމަދު މުޢުތަސިމް އަދުނާނު ވިދާޅުވީ، މަދަނީ މައްސަލަތަކުގައި ވަކީލަކު އައްޔަނުކުރުމުގެ ޤާބިލްކަން ނެތުމުގެ ސަބަބުން އެފަރާތްތަކުގެ ޙައްޤުތައް ގެއްލިގެންދާ ކަމަށެވެ. އެހެންކަމުން އެފަދަ ފަރާތްތަކަށްވެސް ޤާނޫނީ އެހީތެރިކަން ފޯރުކޮށްދެވޭނެ ދެމެހެއްޓެނިވި ނިޒާމެއް އޮތުމަކީ މުހިއްމު ކަމެއްގެ ގޮތުގައި އެމަނިކުފާނު ފާހަގަކުރެއްވިއެވެ.

އުއްތަމަ ފަނޑިޔާރު ވިދާޅުވީ، ކޮންމެ މީހެއްގެ މަދަނީ ޙައްޤުތަކާއި ވާޖިބުތައް ކަނޑައެޅުމުގައި، ނުވަތަ ޖިނާޢީ ކުށެއްގެ ދަށުވާ މީހެއްގެ މައްޗަށް އުފުލުމުގައި، ޤާނޫނަކުން ޤާއިމްކޮށްފައިވާ މިނިވަން އަދި މުސްތަޤިއްލު ކޯޓެއްގައި ނުވަތަ ޓްރައިބިއުނަލެއްގައި އެކަށީގެންވާ މުއްދަތެއްގެ ތެރޭގައި، ޢަދުލުވެރިކަމާއި ހާމަކަމާއި އެކު، ޝަރީއަތް ކުރެވުމުގެ ހައްޤު ޤާނޫނު އަސާސީން ވަނީ ކަށަވަރުކޮށްދީފައިކަމަށެވެ. އަދި ހަމައެއާއެކު ހައްޔަރުކުރެވޭ ހިނދުންފެށިގެން، އެމައްސަލަ ނިމެންދެން، ޤާނޫނީ ވަކީލެއްގެ އެހީތެރިކަން، ދެމެހެއްޓުމުގެ ފުރުޞަތި ފަހިކޮށްދިނުމަކީ، ޤާނޫނު އަސާސީން ކަނޑައަޅާފައިވާ އަސާސި ޙައްޤެއްކަންވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.

ރާއްޖޭގައި އަދުލްއިންސާފު ޤާއިމްކުރުމާއި ޝަރީއަތް ކުރުމުގެ ނިޒާމްތައް ރޭވިފައި އޮންނަ ގޮތުން ދައުލަތުން ވަކީލަކު ހަމަޖައްސައިދޭނީ، ޖިނާޢީ ކުށްތަކުގެ ތުހުމަތު ކުރެވިފައިވާ ފަރާތްތަކުގެ ތެރެއިން އަމިއްލައަށް ވަކީލަކު އައްޔަނުކުރުމުގެ ޤާބިލްކަން ލިބިފައި ނުވާ ފަރާތްތަކަށް އެކަންޏެވެ. މަދަނީ މައްސަލަތަކުގައި ޤާނޫނީ ވަކީލަކު ނެތުމުން ހައްޤުތައް ގެއްލިގެންދާކަން ޝަރުއީދާއިރާގެ އެންމެ މަތީ ކޯޓުގެ އެންމެ މަތީ ފަނޑިޔާރަށްވެސް އެނގިވަޑައިގެން ހުންނެވި އިރު، އެކަމުގައި މިހާތަނަށް އެފަރާތުން އެޅުއްވި ފިޔަވަޅެއް އުއްތަމަ ފަނޑިޔާރުގެ ވާހަކަފުޅުގައި ހާމައެއް ނުކުރައްވައެވެ.