ކުރިމިނަލްކޯޓަށް ދިމާވެފައި ޢިމާރާތާއި ޖާގައިގެ ދަތިކަމުގެ ސަބަބުން ޖިނާއީ ހުރިހާ މައްސަލަތަކެއް މާލޭގައި މިވަގުތު އޮތީ ހުއްޓިފައިކަމަށާއި، އެކަމަކީ ދައުލަތުގެ އެންމެހާ ފަރާތްތައް ގުޅިގެން، އަވަސް ޙައްލެއް ހޯދައިދޭން ޖެހޭނެ ކަމެއް ކަމުގައި އުއްތަމަ ފަނޑިޔާރު އަޙްމަދު މުޢްތަސިމް އަދުނާނު ވިދާޅުވެއްޖެއެވެ. 

އުއްތަމަ ފަނޑިޔާރު މިހެން ވިދާޅުވީ، ޝަރުއީ ދާއިރާގެ 'ޤަޟާއީ އަހަރު 2024' އިފްތިތާޙުކުރުމުގެ ގޮތުން މިރޭ ދަރުބާރުގޭ ރަންނަބަނޑޭތި މާލަމުގައި ބޭއްވި ޖަލްސާގައި ވާހަކަފުޅު ދައްކަވަމުންނެެވެ.

އުއްތަމަ ފަނޑިޔާރުގެ ވާހަކަފުޅުގައި ކުރިމިނަލް ކޯޓަށް ދިމާވެފައިވާ ދަތިތަކާއި އެކު ޖިނާޢީ އަދުލުގެ ނިޒާމަށް ކުރާ އަސަރުގެ މައްޗަށް އަލިއަޅުއްވާ ލައްވައި އެކަމުގެ ކަންބޮޑުވުން ފާޅުކުރެއްވިއެވެ. މިގޮތުން އުއްތަމަ ފަނޑިޔާރުގެ ވާހަކަފުޅުަގައި ކުރިމިނަލް ކޯޓުެގެ އިމާރާތް ބާވުމުގެ ސަބަބުން އެކޯޓުގެ މަސައްކަތްތަކާއި ޝަރީއަތްތައް ހުއްޓިފައިވާ ކަމުގައި ވިދާޅުވިއެވެ.

ކުރިމިނަލް ކޯޓުން މިއަދު އާއްމުކޮށްފައިވާ ތަފާސް ހިސާބުގައި ވާގޮތުން، އެކޯޓަށް ހުށައެޅުނު މައްސަލަތައް 2022 ވަނަ އަހަރަށް ވުރެ 2023 ވަނަ އަހަރު އިތުރުވި ނަމަވެސް، ތާވަލު ކުރެވުނު މައްސަލަތަކާއި، ނިންމުނު މައްސަލަތައް ވަރަށް ބޮޑަށް ދަށަށް ދިޔައީ، މިދިޔަ އަހަރުގެ ފެބުރުއަރީ މަހުން ފެށިގެން، ކޯޓުގެ އެއްބައި ހިންގަމުން އައި އިމާރާތް ބޭނުން ނުކުރުމަށް އެންގުމާއި ގުޅިގެންނެވެ. އެކަމާއި ގުޅިގެން ކޯޓުގެ ޝެޑިއުލްތަކަށް ބުރޫއަރައި، ކޯޓުގެ މަސައްކަތްތަކަށް ވަރަށް ބޮޑު ދަތިތަކެއް ދިމާވި ކަމުގައި އެކޯޓުން ބުންޏެވެ.