އިލެކްޝަންސް ކޮމިޝަނުގެ މެމްބަރުކަމަށް ކުރިމަތިލުމަށް ރައީސުލްޖުމްހޫރިއްޔާގެ އޮފީހުން ހުޅުވާލައިފިއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ،  ކޮމިޝަނަށް މެންބަރަކު ޢައްޔަންކުރެއްވުމަށްޓަކައި މެންބަރުކަމުގެ މަގާމަށް ކުރިމަތިލުމުގެ ފުރުޞަތު މިއަދު ހުޅުވާލީ، އިލެކްޝަންސް ކޮމިޝަންގައި މިހާރު ތިއްބެވި މެންބަރުންގެ ތެރެއިން މެންބަރެއްގެ މަގާމުގެ މުއްދަތު ހަމަވާތީ ކަމަށެވެ.

އެނގިފައިވާ ގޮތުގައި މަޤާމުގެ މުއްދަތު އެންމެ އަވަހަށް ހަމަވަނީ، މިހާރު ކޮމިޝަންގެ ނައިބު ރައީސްގެ މަޤާމުގައި ހުންނެވި އިސްމާއީލް ޙަބީބެވެ. ޙަބީބަކީ، އިލެކްޝަންސް ކޮމިޝަނުގައި މިހާރު ތިއްބެވި މެމްބަރުންގެ ތެރެއިން އެންމެ ގިނަ ބޭފުޅުންނަށް ފާހަގަކުރެވޭ މެމްބަރެވެ. އިލެކްޝަންސް ކޮމިޝަނާއި ގުޅޭ ކަންކަމުގައި، އެމަނިކުފާނު މީޑިއާތަކާއި ގާތްގުޅުމެއް ބާއްވައެވެ.

ޙަބީބުގެ ދައުރު، މަޖިލިސް އިންތިޚާބު ބާއްވާ މާރިޗު 17 ގެކުރިން ހަމަވާނެއެވެ. އިންތިޚާބުގެ ކަންކަމުގައި އެންމެ އިސްކޮށް ޙަބީބު މަސައްކަތް ކުރައްވަމުން ގެންދަވާއިރު، 13 މާރިޗުގައި 2024ގައި ޙަބީބުގެ މަޤާމުގެ ދައުރު ހަމަވާނެއެވެ.

އިލެކްޝަންސް ކޮމިޝަންގެ މެމްބަރު ކަމުގެ މަޤާމަށް ކުރިމަތިލާން އެދޭ ފަރާތްތަކުން ރައީސުލްޖުމްހޫރއިްޔާގެ އޮފީހަށް ފޯމް ހުށައަޅަންޖެހޭނީ ޖެނުއަރީ މަހުގެ 29 އަދި 30 މި ދެދުވަހުން ދުވަހެއްގައެވެ.

އިލެކްޝަންސް ކޮމިޝަންގެ ޤާނޫނު ބުނާގޮތުން އެކޮމިޝަނުގައި 5 މެމްބަރުން ތިއްބަވަންޖެހެއެވެ. އަދި ކޮންމެ މެމްބަރެއްގެވެސް ދައުރަކީ، މީލާދީ ގޮތުން 5 އަހަރު ދުވަހެވެ.