އެންމެ ބޮޑު އިދިކޮޅު ޕާޓީ އެމްޑީޕީން އެޕާޓީގެ މަޖިލިސް ޕްރައިމަރީއަށް ވޯޓުލުމުގެ ހައްގު ލިބިފައިވާ މީހުން ރީ-ރީރެޖިސްޓްރީ ކުރުމަށް ދީފައިވާ މުއްދަތު އިތުރުކޮށްފިއެވެ.

އެމްޑީޕީން ބުނީ، ރީރެޖިސްޓްރީކުރުމަށް އެދި ހުށައެޅުމުގެ މުއްދަތު، ޖެނުއަރީ 22 ވާ ހޯމަ ދުވަހުގެ މެންދުރުފަހު 2:00 އާއި ހަމައަށް މިހާރު އިތުރުކޮށްފައިވާ ކަމަށެވެ.

އެމްޑީޕީގެ ޕްރައިމަރީ 43 ދާއިރާއެއްގައި ބާއްވާއިރު، 112 ކެންޑިޑޭޓުން ވާދަކުރާނެއެވެ. އެޕާޓީގެ ޕްރައިމަރީ ބޭއްވުމަށް މިހާރު ކަނޑައަޅާފައި ވަނީ، އަންނަ ފެބުރުއަރީ މަހުގެ 03 ވަނަ ދުވަހުގައެވެ.

އެމްޑީޕީގެ މެމްބަރުންގެ އަދަދު ފަންސާސް ހާހަށްވުރެ މަތި އިރު، މަޖިލިސް ޕްރައިމަރީ ވެފައި އޮންނަނީ އެޕާޓީން ބާއްވާ އެންމެ ފޯރިގަދަ އަދި އެންމެ ވާދަވެރި އިންތިޚާބަށެވެ.