ޚާއްސަ ރަސްމިއްޔާތަކާއި އެކު ހިޔަލަ ވީކްއެންޑް މާކެޓް މާދަމާރޭ ހުޅުވުމަށް ނިންމައިފިއެވެ.

ބިޒްނަސް ސެންޓަރ ކޯޕަރޭޝަން ލިމިޓެޑުން ކުރިޔަށް ގެންދާ ހިޔަލަ ވީކްއެންޑް މާކެޓު ކުރިޔަށް ދާނީ، ހުޅުމާލެ ރެޑްވޭވް މެގަމޯލްގެ ފުރަގަހުން އޮންނަ ކޮންޓެއިނާ ޕާކުގެ އިރުމަތިން އޮންނަ ސަރަހައްދުގައެވެ. އެސަރަހައްދުގައި، 10 ކިއޮްސްކެއް ހެދުމުގެ މަސައްކަތް މިހާރު ދަނީ ކުރަމުންނެވެ.

ހުޅުމާލޭގައި ތަރައްޤީ ކުރާ "ހިޔަލަ ވީކެންޑް މާކެޓު"ގައި ކުއްޔަށް ދޫކުރާ ކިއޮސްކްތަކަށް އެދި ފޯމު ހުށަހެޅުމުގެ ފުރުސަތުވެސް މިހާރު ވަނީ ހުޅުވާލާފައެވެ. ބީސީސީން ބުނީ، ކޮންމެ ހަފްތާއެއްގެ ހުކުރު އަދި ހޮނިހިރު ދުވަހު ހަވީރު 4 އިން ރޭގަނޑު 11 އަށް ހުޅުވާފައި ހުންނަ މި މާކެޓުގައި ބައިވެރިވުމަށް ޝައުގުވެރިވާ ފަރާތްތައް އެކަމަށް ޓަކައި ފޯމު ހުށަހެޅުމާއެކު ދަފްތަރު ކުރެވިގެންދާނެއެވެ. ކޮންމެ ހަފްތާއެއްގައި ވެސް މި ކިއޮސްކްތަކަށް ވިޔަފާރިތައް ހޮވާނީ ދަފްތަރު ކުރެވިފައިވާ ތަރުތީބުންނެވެ.

މިއިން ކޮންމެ ކިއޮސްކެއްވެސް ދޫކުރުމަށް ހަމަޖައްސާފައި ވަނީ، ހަފްތާ ބަންދަަކަށް 300ރ އަށެވެ. 

ކިއޮސްކު ކުއްޔަށް ހިފަން އެދޭ ފަރާތްތަކުގެ ކިބައިގައި ހުންނަން ޖެހޭ ޝަރުޠުތަކުގެ ތެރޭގައި، ހިމެނެނީ އުމުރުން 18 އަހަރު ފުރިފައިވާ ދިވެހި އަންހެނަކަށް ވުމެވެ.