ހުސްވި 2023 ވަނަ އަހަރު ކުރިމިނަލް ކޯޓަށް ހުށައެޅުނު މައްސަލަތައް އިތުރުވިއިރު، ނިމުނު މައްސަލަތަކުގެ އަދަދު %55 ދަށްވެއްޖެއެވެ.

ކްރިމިނަލްކޯޓުން ވިދާޅުވީ، އެކޯޓަށް ހުށައެޅުނު މައްސަލަތައް 2022 ވަނަ އަހަރަށް ވުރެ 2023 ވަނަ އަހަރު އިތުރުވި ނަމަވެސް، ތާވަލު ކުރެވުނު މައްސަލަތަކާއި ނިންމުނު މައްސަލަތައް ވަރަށް ބޮޑަށް ދަށަށް ދިޔައީ، މިދިޔަ އަހަރުގެ ފެބުރުއަރީ މަހުން ފެށިގެން، ކޯޓުގެ އެއްބައި ހިންގަމުން އައި އިމާރާތް ބޭނުން ނުކުރުމަށް އެންގުމާއި ގުޅިގެން ކަމަށެވެ. އެކަމާއި ގުޅިގެން ކޯޓުގެ ޝެޑިއުލްތަކަށް ބުރޫއަރައި، ކޯޓުގެ މަސައްކަތްތަކަށް ވަރަށް ބޮޑު ދަތިތަކެއް ދިމާވި ކަމުގައި އެކޯޓުން ބުންޏެވެ.

ކޯޓުން ހާމަކޮށްފައިވާ ތަފާސް ހިސާބަށް ބަލާއިރު، 2023 ވަނަ އަހަރު އެކޯޓަށް 854 މައްސަލަ ހުށައެޅުނެވެ. އެއީ އޭގެ ކުރީ އަހަރާއި އަޅާބަލާއިރު 64 މައްސަލަ އިތުރު އަދަދެކެވެ. ހުސްވި އަހަރު ކްރިމިނަލް ކޯޓުގައި ތާވަލުކުރެވުނީ، 7242 މައްސަލައެވެ. އެއީ އޭގެ ކުރީއަހަރާއި އަޅާބަލާއި %43 މަދު އަދަދެކެވެ. އަދި 2023 ވަނަ އަހަރު އެކޯޓުގައި ނިންމުނީ، 497 މައްސަލައެވެ. އެއީ އޭގެ ކުރީއަހަރާއި އަޅާބަލާއި %55 މަދު އަދަދެކެވެ.

ކުރިމިނަލް ކޯޓުގެ މަސައްކަތްތަކަށް ބުރޫ އެރީ، ތީމުގޭ ފުރަގަހުން ހުންނަ އެކޯޓުގެ އިމާރާތް ބާވެ، އެއިމާރާތް ބޭނުންކުރުން ރައްކާތެރިކަމަކަށް ނުވާތީ އެއިމާރާތް ހުސްކުރަން ޖެހުމުންނެވެ.