އިންޑިއާއަކީ ރާއްޖޭގެ ރަހުމަތްތެރިއެއް ކަމަށާއި އަބަދުވެސް އެ ގައުމަށް އިހުތިރާމް ކުރަން ޖެހޭކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު 'އެކްސް'ގައި ކުރެއްވި ޕޯސްޓެއްގައި ވިދާޅުވީ ދިވެހިން އަމިއްލަ ވެރިކަމެއް ހޯދާފައިވަނީ ހަރުދަނާ އަދި ރޭވުންތެރި ބަޔަކަށް ވާތީ ކަމަށާއި އެއީ ގަދަބާރުން ހޯދި އެއްޗެއް ނޫން ކަމަށެވެ. ނަޝީދު ވިދާޅުވީ ވެރިންގެ ދުރުވިސްނުމެއް ނެތް ނަމަ ރާއްޖެއަށް ގެއްލުންވާނެ ކަމަށެވެ.

"އިންޑިއާއަކީ އަހަރެމެންގެ އަވަށްޓެރިއެއް އަދި ރަހުމަތްތެރިއެއް. އަބަދުވެސް އިންޑިއާއަށް އިހުތިރާމު ކުރަން ވާނެ،" ނަޝީދު ވިދާޅުވި އެވެ.

އިންޑިއާގެ ބޮޑުވަޒީރު ނަރެންދުރަ މޯދީ ލަކްޝަދީޕަށް ކުރެއްވި ދަތުރުގެ ތެރެއިން އެ ސަރަހައްދުގައި ފަތުރުވެރިކަން ކުރިއެރުވުމާ ގުޅޭ ވީޑިއޯއަކާ އެކު، ރާއްޖެ އާއި އިންޑިއާއާ ދެމެދު ސޯޝަލް މީޑިއާގައި ބޮޑު ޒުވާބެއް އުފެދި، ދެ ގައުމުގެ ދެމެދު އޮންނަ ގުޅުން ވަނީ ހީނަރުވެފައެވެ.

އިންޑިއާގެ ބައެއް އާންމުން އެ މެސެޖް ޝެއާކޮށް ގޮވާލަން ފެށީ ރާއްޖެ ބޮއިކޮޓްކޮށް އިންޑިއާގެ ޓޫރިސްޓުން ލަކްޝަދީޕަށް ދިއުމަށެވެ. އެ ވާހަކަތަކަށް ރައްދުދިނުމުގެ ގޮތުން ދިވެހިން ވެސް އެކްސް އާއި ފޭސްބުކް ފަދަ ސޯޝަލް މީޑިއާގެ ވަސީލަތްތަކުގައި ތަފާތު މެސެޖްތައް ލިއުނެވެ. އޭގެ ތެރޭގައި ސަރުކާރުގެ ޑެޕިއުޓީ ތިން މިނިސްޓަރަކު މޯދީ އާއި އިންޑިއާއަށް މަލާމަތްކުރިއެވެ. މިކަމާއި ގުޅިގެން ސަރުކާރުން ބުނެފައިވަނީ އެ 3 ޑެޕިއުޓީ މިނިސްޓަރުން ސަސްޕެންޑްވެސް ކޮށްފައިވާކަމަށެވެ.