ދާޚިލީ ހަމަނުޖެހުންތައް ހިނގަމުންދާ އިސްލާމީ ޤައުމުތަކަށް ޖިހާދުގެ ނަމުގައި ހަނގުރާމައަށް ދިޔުމަކީ ޙަރާމްކަމެއް ކަމުގައި ބުނެ ދިވެހިރާއްޖޭގެ އިސްލާމީ ފިޤުޙް އެކަޑަމީގެ އިސްލާމީ ފަތުވާދޭ އެންމެ މަތީ މަޖިލީހުން ފަތުވާއެއް ނެރެފިއެވެ.

މިއަހަރު އެމަޖިލީހުން ނެރުނު ދެވަނަ ފަތުވާ ޚާއްޞަކޮށްފައި އޮތީ، ދާޚިލީ ހަމަނުޖެހުންތައް ހިނގަމުންދާ އިސްލާމީ ޤައުމުތަކަށް ޖިހާދުގެ ނަމުގައި ހަނގުރާމައަށް ދިޔުމާއި ގުޅޭ ގޮތުންނެވެ. ފިޤްހު އެކަޑަމީގެ، އިސްލާމީ ފަތުވާދޭ އެންމެ މަތީ މަޖިލީހުގެ ފަތުވާގައި ވަނީ، ދާޚިލީ ހަމަނުޖެހުންތައް ހިނގަމުންދާ އިސްލާމީ ޤައުމުތަކަށް ޖިހާދުގެ ނަމުގައި ހަނގުރާމައަށް ދިޔުން ހަރާމްވާ މައިގަނޑު 5 ސަބަބެއް ފާހަގަކޮށްފައެވެ.

މީގެ ތެރޭގައި، ސޫރިޔާ ފަދަ ޤައުމުތަކުގައި ހިނގާ ދާޚިލީ ހަނގުރާމަތަކަކީ، އިސްލާމީ އުއްމަތަށް ދިމާވެފަިއވާ ފިތުނައެއްގެ ގޮތުގައި ފަތުވާ މަޖިލީހުން ވަނީ ބުނެފައެވެ. އަދި ޖިހާދަށް ދެވޭނީ، ވަލިއްޔުލްޢަމުރާއި، އެމީހެއްގެ މައިންބަފައިން ދިރި ދުނިޔޭގައި ތިބިނަމަ އެމީހުންގެ ހުއްދަ ލިބިގެން ކަމުގައިވެސް ބުނެފައިވެއެވެ.

ރާއްޖެއިން ސޫރިޔާ އަށާއި އަފްޣާނިސްތާނަށް ގިނަ އަދަދެއްގެ ބަޔަކު ޖިހާދުގެ ނަމުގައި ހަނގުރާމައަށް ގޮސް އޭގެ ތެރެއިން އެތައް ބަޔަކު ވަނީ މަރުވެފައެވެ. އަދި އެމީހުން ހަނގުރާމަ ހިނގާ ސަރަހައްދުތަކަށް ގެންދިޔަ އެމީހުންގެ އަނބިދަރީން ހާލުގައި ޖެހިފައިވާތީ، ސަރުކާރުން ދަނީ އެމީހުން ހޯދައި އަނބުރާ ޤައުމަށް ގެނައުމުގެ މަސައްކަތް ކުރަމުންނެވެ.