ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީގެ ބްރޭންޑް ނޭމް "އާބަންކޯ"ގެ ނަން ބޭނުން ކުރުން އެކުންފުނިން މިއަދުންފެށިގެން ރަސްމީގޮތުން ހުއްޓާލައިފިއެވެ.

އެކުންފުނި ރީބްރޭންޑްކޮށް، ބްރޭންޑް ނަމެއްގެ ގޮތުގައި ބޭނުން ކުރަން ފަށާފައި ވަނީ، ހުސްވި އަހަރުގެ އޭޕްރީލް މަހުގެ 01 ވަނަ ދުވަހުއެވެ. އެބަދަލު ގެނައީ އެކުންފުނީގެ 22 ވަނަ އަހަރީ ދުވަހާއި ގުޅުވައިގެންނެވެ.

"އާބަންކޯ"ގެ ނަން ބޭނުންކުރުން ހުއްޓާލައި އަލުން އެޗްޑީސީގެ ނަމަށް ނަންބޯޑުތައް ބަދަލުކުރުން ފާހަގަކުރުމަށް މިއަދު ހެނދުނު ވަނީ، އެޗްޑީސީގެ އާއިމާރާތް ކުރިމަތީގައި ޚާއްޞަ ރަސްމިއްޔާތެއްވެސް ބާއްވާފައެެވެ. މިގޮތުން ކުންފުނީގެ ހެޑްއޮފީހުގެ ނަންބޯޑާއި ދިދަވެސް އަދި ކުންފުނީގެ ސޯޝަލްމީޑިއާ އެކައުންޓްތަކުގެ ޑިސްޕްލޭ ނަންތައްވެސް މިއަދު ވަނީ ބަދަލުކޮށްފައެވެ.

ބޮޑު ޚަރަދެއްކޮށްގެން އެޗްޑީސީ ރީބްރޭންޑް ކުރިތާ އަހަރެއްވެސް ނުވަނީ، އަނެއްކާވެސް ނަމާއި ލޯގޯ އާއި ކުންފުނީގެ ޔުނީފޯމްތައް ބަދަލުކުރުމުގެ ސަބަބުން ކުންފުންޏަށް ވާނެ ފައިދާއަކީ ކޮބައިކަމެއް އެކުންފުނިން ހާމަކޮށްފައެއް ނުވެއެވެ.