ނިމިދިޔަ 2023 ވަނަ އަހަރުގެ ޖުލައި މަހު ސައުދީ އަރަބިއްޔާގެ އަލް-އިއްތިފާގަށް ބަދަލުވި ލިވަޕޫލްގެ ކުރީގެ ކެޕްޓަން، ޖޯޑަން ހެންޑަސަން، އެ ކްލަބް ދޫކޮށް ނެދަލޭންޑްސްގެ އަޔެކްސްއާ ގުޅުމަށް ނިންމައިފިއެވެ. ރިޕޯޓުތައް ބުނާ ގޮތުން އަޔެކްސްއާއެކު ހަދާ އެއްބަސްވުމުގައި ސޮއިކުރުމަށް، ބުރާސްފަތި ދުވަހު އޭނާ އެމްސްޓަޑާމަށް ދަތުރުކުރާނެއެވެ. 

ލިވަޕޫލް އަދި އިންގްލެންޑްގެ ކުރީގެ ކެޕްޓަން، ސްޓީވެން ޖެރާޑު ކޯޗުކޮށްދެމުން އަންނަ އަލް-އިއްތިފާގަށް ހެންޑަސަން ބަދަލުވީ 3 އަހަރުގެ ކޮންޓްރެކްޓެއްގައި، ހަފްތާއަކު 7 ލައްކަ ޕައުންޑުގެ މުސާރައަކަށެވެ. އަދި އޭނާގެ ޓްރާންސްފާ ފީ އަކީ 12 މިލިއަން ޕައުންޑެވެ. ނަމަވެސް އޭނާ އަޔެކްސްއަށް ބަދަލުވާ އަގު އަދި މިހާތަނަށް ހާމަކޮށްފައެއް ނުވެއެވެ.

ސައުދީ ޕްރޯ ލީގުގައި އެންމެ 17 މެޗު ކުޅުމަށްފަހު ޔޫރަޕަށް ބަދަލުވާން ހެންޑަސަން ނިންމީ، ސައުދީގައި ދިރިއުޅުމަށް އޭނާ އެހާ ހިންހަމަ ނުޖެހޭތީކަމަށް ރިޕޯޓުތައް ބުނެއެވެ. 

ލިވަޕޫލާއެކު ހެންޑަސަން ވަނީ 12 ސީޒަން ކުޅުފައެވެ. އަދި 2015 ވަނަ އަހަރު ލިވަޕޫލް ދޫކޮށް ޖެރާޑު ދިއުމާ ގުޅިގެން، އެ ކްލަބުގެ ކެޕްޓަނެއްގެ ޒިންމާ ވެސް ހަވާލުކުރީ އޭނާއާއެވެ.