ސިޓީ ކައުންސިލުގެ މަސައްކަތްތައް އަތުލައްވަން ކުރައްވާ މަސައްކަތްތައް ހުއްޓާލުމަށާއި، ސިޓީކައުންސިލްގެ ނިންމުމަށް އަމަލު ކުރުން ފަސްކުރުމަށް، އިންތިޚާބީ މޭޔަރު އާދަމް އާޒިމް ގޮވާލައްވައިފިއެވެ.

މިމަހުގެ 13 ވަނަ ދުވަހު، ބޭއްވި މާލޭގެ މޭޔަރު ހޮވުމުގެ ބައި އިލެކްޝަން ކާމިޔާބު ކުރެއްވި އާދަމް އާޒިމް މިކަމަށް ގޮވާލެއްވީ، އާޒިމް މަޤާމާއި ހަވާލުވެވަޑައި ނުގަންނަވަނީސް، ސިޓީ ކައުންސިލުން މިއަދު ނިންމުމާއި މެދު ކަންބޮޑުވުން ފާޅުކުރައްވައި އެކްސްގައި ލިޔުއްވި ޕޯސްޓުގައެވެ.

މިއަދު މާލޭ ސިޓީކައުންސިލުން ވަނީ، މިއަދު ބޭއްވި އެކައުންސިލްގެ 4 ވަނަ ދައުރުގެ 130 ވަަނަ ޖަލްސާގައި ވަނީ، އެކައުންސިލުން ހިންގާ ބޮޑެތި ޕްރޮޖެކްޓްތައް އިންފްރާސްޓްރަކްޗާ މިނިސްޓްރީން ހިންގާ ގޮތަށް ފާސްކޮށްފައެވެ. އެހުށައެޅުން ފާސްކޮށްފައި ވަނީ ކައުންސިލްގެ ޖަލްސާގައި ބައިވެރިވި، މެމްބަރުންގެ ތެރެއިން 10 މެމްބަރުންގެ ވޯޓުންނެވެ.

މިހުށައެޅުމަކީ، ސިޓީކައުންސިލުން ހިންގުމަށް ހަމަޖެހިފައިވާ، 100 މިލިއަން ރުފިޔާއަށްވުރެ ބޮޑެތި މަޝްރޫއުތައް ސަރުކާރާއި ހަވާލުކުރުމަށް ހުށައަޅާފައިވާ ހުށައެޅުމެކެވެ. 

ކުރިންވެސް އަންދާޒާ ކުރެވުނު ގޮތަށް އިދިކޮޅު ޕާޓީއަށް މާލޭ ސިޓީކައުންސިލްގެ މޭޔަރުކަން ލިބުމާއި ގުޅިގެން ސަރުކާރުން ވަނީ ސިޓީކައުންސިލްގެ ޒިންމާތަކާއި އިހްތިޞާސްތަކަށް ބަދަލު ގެނައުމުގެ މަސައްކަތް ފަށާފައެވެ. 

ޕީޕިއެމްގެ ސަރުކާރުގެ ދުވަސްވަރުގައި، މާލޭގެ ހަތަރު ސަހަރާ ބެލެހެއްޓުމާއި ވިހާމަރުވާ ބެލެހެއްޓުން ފިޔަވައި އެހެން ހުރިހާ ކަމެއް ހައުސިން މިނިސްޓްރީގެ ދަށަށް ގެންދިޔައެވެ. އޭރު ހައުސިންގ މިނިސްޓަރަކަށް ހުންނެވީ މިހާރުގެ ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒެވެ.