މާޒިޔާ ސްޕޯޓްސް އެންޑް ރެކްރިއޭޝަން އިސްވެ، ޖުމްލަ 10 ކްލަބަކުން ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) އިން އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް ހުށަހަޅައިފިއެވެ. 

އެފްއޭއެމްގެ މެމްބަރު ކްލަބްތަކުގެ އަގުލަބިއްޔަތު ހިމެނޭ ގޮތަށް ހުށަހެޅި މި ހުށަހެޅުމުގެ ބޭނުމަކީ، އެފްއޭއެމް އިދާރީ ގޮތުން ހިންގުމުގައި ހުންނަންޖެހޭކަމަށް އަސާސީ ގަވާއިދުގައި ލާޒިމްކުރާ ކޮމިޓީތައް އެކުލަވާލުމާއި، އުސޫލާ ޚިލާފަށް ބައެއް ކޮމިޓީތައް އެކުލަވާލާފައިވާތީ އެކަން އިސްލާހު ކުރުމާއި އަދި ބައެއް ކޮމެޓީތަކުގެ މެމްބަރުން އިސްތިއުފާދިނުމުގެ ސަބަބުން ކޮމެޓީތައް ހަރަކާތްތެރިވުމަށް ކުރިމަތިވެފައިވާ އިދާރީ ގޮންޖެހުންތައް ހައްލު ކުރުމެވެ.  

އެގޮތުން، އެ ހުށަހެޅުމުގައި ވާގޮތުން، ކޮންގްރެސްގެ އެޖެންޑާގައި ހިމެނޭނީ، އިލެކްޓޯރަލް ކޮމެޓީއާއި، އިލެކްޓޯރަލް އެޕީލް ކޮމެޓީ އަލުން އެކުލަވާލުމާއި، އެފްއޭއެމްއާ ގުޅޭ މައްސަލަތައް ބަލެމަށް ހާއްސަކޮށް އުފައްދާފައިވާ ޑިސިޕްލިނަރީ ކޮމެޓީއާއި، އެތިކްސް ކޮމެޓީ އަދި އެޕީލްސް ކޮމެޓީ އެކުލަވާލުމެވެ. 

މާޒިޔާއަށް ތާއީދުކޮށް، އެފްއޭއެމްގެ 18 މެމްބަރު ކްލަބުތަކުގެ ތެރެއިން 10 ކްލަބަކުން އެކްސްޓްރާ އޯޑިނަރީ ކޮންގްރެސްއަށް ގޮވާލާފައިވުމާއި ގުޅިގެން، އެފްއޭއެމްގެ އަސާސީ ގަވާއިދުގައިވާގޮތުން 14 ދުވަސް ތެރޭގައި މި ކޮންގްރެސް ބާއްވަން ޖެހޭނެއެވެ. މި ހުށަހެޅުމާ އެއްގޮތަށް ކަންކަން ނުހިނގައިފިނަމަ، ފީފާ އާއި އޭއެފްސީއާ ގުޅިގެން ކްލަބްތަކަށް މި ކޮންގްރެސް ބޭއްވޭނެއެވެ. 

މާޒިޔާއާއެކު ކޮންގްރެސްއަށް ތާއީދުކޮށްފައިވަނީ ކްލަބް ވެލެންސިއާ އާއި، ކުޑަހެންވޭރު ޔުނައިޓެޑާއި، ޓީސީ ސްޕޯޓްސް ކްލަބާއި، އެލްޓީ ސްޕޯޓްސް ކްލަބާއި، ބީޖީ ސްޕޯޓްސް ކްލަބާއި، ޓެންޓް ސްޕޯޓްސް ކްލަބާއި، މަހިބަދޫ ސްޕޯޓްސް ކްލަބާއި، ދަ ގްރާންޑޭ ސްޕޯޓްސް ކްލަބާއި އަދި ސީބީއެލް ސްޕޯޓްސްއެވެ.

މާޒިޔާއިން މިފަދަ ހުށަހެޅުމެއް ހުށަހަޅާފައިވާއިރު، އެ ކްލަބުގެ ތާއީދާއެކު އެފްއޭއެމްގެ ރައީސްކަމަށް ކުރިމަތިލާފައިވާ އެ އިދާރާގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙްމަދު ޠާރިގު (ޓޮމް)ގެ ކެނޑިޑެސީ ސައްހަ ނޫންކަމަށް އެފްއޭއެމްގެ އިލެކްޓޯރަލް ކޮމެޓީއިން ވަނީ ނިންމާފައެވެ. އެއީ ކްލަބް ވެލެންސިއާގެ ތާއީދު ސިޓީ މި އިންތިހާބަށް ކުރިމަތިލި ދެ ކެނޑިޑޭޓުންގެ އަތުގައި އޮތުމުން، ކްލަބް ވެލެންސިއާގެ ދެ ސިޓީވެސް ގަބޫލު ނުކުރުމަށް ނިންމުމާ ގުޅިގެން، ޠާރިގުގެ ތާއީދު ސިޓީ ހަމަނުވާތީއެވެ. ޠާރިގުވަނީ މި ނިންމުން އަލުން ދިރާސާ ކުރުމަށް ހުށަހަޅާފައެވެ. ނަމަވެސް އެފްއޭއެމްގައި އިލެކްޓޯރަލް އެޕީލް ކޮމެޓީއެއް ނެތުމުން، މި މައްސަލައިގައި ލަފާ ހޯދުމަށް އެފްއޭއެމުން ވަނީ ފީފާއާއި އޭއެފްސީގައި އެދިފައެވެ.