ސަރުކާރު ހިންގާ ޕާޓީ ޕީއެންސީ އެޕާޓީގެ މަޖިލިސް ޕްރައިމަރީ ތިންވަނަ ފަހަރަށް ފަސްކޮށް ވޯޓާސް ލިސްޓް އިއުލާނުކޮށްފިއެވެ.

ޕީއެންސީން ބުނީ 2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ފަރާތުން ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރޮގްރެސިވް ކޮންގްރެސް ކޯލިޝަންގެ ޕްރައިމަރީ 2024 ޖަނަވަރީ 27 ވާ ހޮނިހިރު ދުވަހަށް ވަނީ ފަސްކޮށްފައިވާ ކަމަށެވެ. އެހެންނަމަވެސް މި ޕްރައިމަރީގައި ވޯޓު ލެވޭ މި ކޯލިޝަންގެ މެންބަރުންގެ ލިސްޓް މިހާރު ވަނީ www.pnc.mv ވެބްސައިޓްގައި ޢާންމުކޮށްފައި ކަމުަގައިވެސް އެޕާޓީން ވަނީ ބުނެފައެވެ.

އެޕާޓިން ބުނީ، ވޯޓު ލެވޭ މީހުންގެ ލިސްޓުގައި އެއްވެސް މައްސަލައެއް ފާހަގަކުރެވިފައިވާނަމަ، މައްސަލައިގެ ތަފްސީލާއެކު ލިޔުމުން 2024 ޖަނަވަރީ 18 ވާ ބުރާސްފަތި ދުވަހުގެ އިރުއޮއްސި 6:00 ގެ ކުރިން ޕީއެންސީ އޮފީސް (ސީ ޓްރެކް ބިލްޑިންގ 7 ވަނަ ފަންގިފިލާ) އަށް ނުވަތަ [email protected] އަށް ފޮނުއްވައިދެއްވުން އެދޭ ކަމަށާއި ސުންގަނޑި ހަމަވުމަށްފަހުގައި ފޮނުވާ ޝަކުވާތައް ބަލައި ނުގަންނާނެ ކަމަށެވެ.