ހުޅުމާލެ ފޭސް 2ގެ ހިޔާ ސަރަހައްދުގައި ރޯދަމަހަށް ޚާއްސަކޮށްގެން ވަގުތީ މިސްކިތެއް އެޅުމުގެ މަސައްކަތް އާބަންކޯއިން ފަށައިފިއެވެ.

އެކުންފުނިން ބުނީ، ރަމަޟާން މަހަށް ތައްޔާރުވުމުގެ ގޮތުން، ހުޅުމާލެ ދެވަނަ ފިޔަވަހީގައި ދިރިއުޅޭ ރައްޔިތުންނަށް ލުއިފަސޭހަ ކޮށްދިނުމަށް، އެކުންފުނިން ދަނީ ވަގުތީ މިސްކިތެއް ބިނާ ކުރުމުގެ މަސައްކަތް ހަލުވިކަމާއިއެކު ކުރަމުންނެވެ.

އަންހެނުންނާއި ފިރިހެނުންގެ ބައި ވަކިކޮށް ހަދަމުންދާ މި މިސްކިތުގައި 150 މީހުންގެ ޖާގަ ހިމެނޭނެ ކަމަށްވެސް އާބަންކޯއިން ބުންޏެވެ. އެކުންފުނީގެ އަމާޒަކީ ރަމަޟާންމަހުގެ ކުރިން މި ވަގުތީ މިސްކިތް ނިންމުމެވެ.

މިހާރުވެސް ހުޅުމާލެ ފޭސް 2 ގައި ވަގުތީ ދެ މިސްކިތް ހުރި އިރު ދާއިމީ ހުރީ އެއް މިސްކިތެވެ. އަދި ދެވަނަ މިސްކިތެއް އިމާރާތް ކުރުމުގެ މަސައްކަތް މިހާރު ވަނީ ނިމުމާއި ގާތްވެފައެވެ.

އަލަށް އަޅާ މި މިސްކިތް އަޅަނީ، ހިޔާގެ ނޫ ޓަވަރުތަކުގެ އުތުރުން އަދު ރަތް ޓަވަރުތަކުގެ އިރުން އޮންނަ ބިމުގައެވެ.