ދޮން އަނދަރާދަ ހިނގުން ހުޅުވާލުމަށް އެމްޓީސީސިގެ މުވައްޒަފުން ކުރަމުންދާ މަސައްކަތްތައް، އެކުންފުނީގެ ސީއީއޯ ޢަބުދުﷲ ޒިޔާދު އެސަރަހައްދަށް ޒިޔާރަތް ކުރައްވައި ބައްލަވާލައްވައިފިއެވެ.

ދޮންއަނދަރާދަ ހިނގުން ހުޅުވާލުމުގެ މަސައްކަތުގެ ތެރެއިން އެމަގަށް ވާގޮތަށް ކުރިން އަޅާފައި ހުރި އިންޖީނުގެތަކުގައި، އިންޖީނު ބެހެއްޓުމަށް ތައްޔާރުކޮށްފައި ހުރި ބެޑްތައް ތަޅާލައި މެގުމުގެ މަސައްކަތް ކުރަމުން ދަނީ އެމްޓީސީސިންނެވެ. 6 ފޫޓު ބޯމިނުގައި އަޅާފައިވާ ބޮޑެތި ކޮންކްރީޓް ބެޑުތައް އެތަނުން ތަޅައި މެގުމުގެ މަސައްކަތަކީ، އެމަގު ހުޅުވާލުމަށް ސްޓެލްކޯއިން ކުރި މަސައްކަތަށް ކުރިމަތިވި އެންމެ ބޮޑު ގޮންޖެހުމެވެ.

އެމްޓީސީސިން ކޮންކްރީޓް ބެޑްތައް ތަޅައި ނެގުމުގެ މަސައްކަތުގެ ތެރެއިން --- ފޮޓޯ: ނޫން.އެމްވީ

އެންމެ ފުރަތަމަ މިޖެނުއަރީ މަހުގެ ތެރޭގައި އެމަގު ހުޅުވާލުމަށް އަމާޒު ސްޓެލްކޯއިން އަމާޒު ހިފިނަމަވެސް އެކަމުގައި ދިމާވެ އެންމެ ބޮޑު ގޮންޖެހުމަކީ، ބޮޑެތި ކޮންކްރީޓް ބެޑްތައް ތަޅާލައި ބިން ސާފުކުރުމުގެ މަސައްކަތެވެ. އެމަސައްކަތް ފުރަތަމަ ހަވާލުކުރި ކުންފުނިތަކަށް ކުރެވޭގޮތް ނުވުމުން މިހާރު އެމަސައްކަތް ކުރަމުން ދަނީ އެމްޓީސީސީންނެވެ.

ސްޓެލްކޯއިން އަމާޒު ހިފާފައި ވަނީ ރޯދައިގެ ކުރިން ދޮން އަނދަރާދަ ހިނގުން ހުޅުވާލުމެވެ. އަދި އެމަގު ހުޅުވާލުމުގެ ދެބައިވެގެންދާ ސްޓެލްކޯގެ ދެބިން، ގުޅުވާލުމަށް ނިންމާފައި ވަނީ، ދަށުން ހެވީ ވެހިކަލްތައްވެސް ދަތުރު ކުރާނޭ ޖާގަ ލިބޭ ގޮތަށް މަތިން ބްރިޖެއް އަޅައިގެން ކަމުަގައި ސްޓެލްކޯއިން ވަނީ ބުނެފައެވެ.

މީގެ 13 އަހަރު ކުރިން ބަންދުކުރި، ދޮން އަނދަރާދަ ހިނގުން އަމީނީ މަގާއި ބޮޑުތަކުރުފާނު މަގު ގުޅިގެންދާގޮތަށް ހުޅުވާލުމުން އެސަރަހައްދުގެ އާއްމު ޓްރެފިކަށް ފަސޭހަތައް ވެގެންދާނެއެވެ.