މާލޭގެ ބޮޑުތަކުރުފާނު މަގުގައި ޓްރެފިކަށާއި އާއްމުންނަށް ދަތިވާގޮތަށް ހުރި ސްޓެލްކޯގެ ޕަމްޕް ސްޓޭޝަން، އެދިމާއިން ފަޅުތެރެއަށް ބަދަލުކުރުމުގެ މަސައްކަތް ކުރުމަށް ސްޓެލްކޯ އާއި އެމްޓީސީސީން އެއްބަސްވުމެއްގައި ސޮއެކޮށްފިއެވެ.

މިއަދު ސްޓެލްކޯގައި ބޭއްވި ޚާއްސަ ރަސްމިއްޔާތެއަގއި މިފަހުމް ނާމާގައި ސްޓެލްކޯގެ ފަރާތުން ސޮއެކުރެއްވީ އެކުންފުނީގެ މެނޭޖިންގ ޑައިރެކްޓަރ ޙުސައިން ފަހުމީއެވެ. އަދި އެމްޓީސީސީގެ ފަރާތުން އެއްބަސްވުމުގައި ސޮއެކުރެއްވީ އެކުންފުނީގެ ސީއީއޯ އަދި މެނޭޖިން ޑައިރެކްޓަރ ޢަބުދުﷲ ޒިޔާދެވެ.

މިއެއްބަސްވުމުގެ ދަށުން ފަޅުތެރޭގައި އައު ޕަމްޕްސްޓޭޝަން ހެދުމަށް ބޭނުންވާ ސަރަހައްދު ހިއްކުމާއި ޕްލެޓްފޯމް އެޅުމުގެ މަސައްކަތްތައް ކުރާނީ އެމްޓީސީސީންނެވެ. 

ސްޓެލްކޯގެ މެނޭޖިން ޑައިރެކްޓަރ ހުސައިން ފަޙްމީ ވިދާޅުވީ، އެމަސައްކަތަށް ސްޓެލްކޯގެ ބަޖެޓުން 7.1 މިލިއަން ރުފިޔާ ޚަރަދުވާނެ ކަމަށާއި، އަމާޒު ހިފާފައި ވަނީ ދެމަސް ދުވަހުގެ ތެރޭގައި އެމަސައްކަތް ނިންމުމަށް ކަމަށެވެ. 

ފަހްމީ ވިދާޅުވީ، ޕަމްޕް ސްޓޭޝަން ބަދަލުކުރުމުން ކުންފުނީގެ ޚިދުމަތްތަކަށް ވަކި ބަދަލެއް ނާންނާނެ ކަމަށާއި އެހެން ނަމަވެސް އެކަމުގެ އެންމެ ބޮޑު ފަސޭހައަކާއި ހިތްހަމަ ޖެހުމެއް ލިބޭނީ މަގު ބޭނުން ކުރާ އާއްމު ރައްޔިތުންނަށް ކަމަށެވެ. ބޮޑުތަކުރުފާނު މަގުގެ އާއްމު ޓްރެފިކަށް ދަތިވާ ގޮތަށް ސައިކަލް ލޭނު ތެރެއަށް އަރާ ގޮތަށް ހުންނަ އެޕަމްޕް ސްޓޭޝަން އިމާރާތުގެ ސަބަބުން މިހާތަނަށްވެސް އެއްގަމު އުޅަނދު ފަހަރު ދުއްވާ މީހުންނަށާއި ހިނގާ މީހުންނަށް ދަތިވެއެވެ.