ރާއްޖޭގައި "ވަރޓިކަލް ފާމިން" ފުޅާ ދާއިރާއެއްގައި ކުރެވިދާނެތޯ ބެލުމަށްޓަކައި ޕައިލެޓް ޕްރޮޖެކްޓެއް ހިންގުމުގެ އެއްބަސްވުމެއްގައި މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ އާއި ވިސީ ގްރޫޕް ޕްރައިވެޓް ލިމިޓެޑުން އެއްބަސްވުމެއްގައި ސޮއެކޮށްފިއެވެ.

އެގްރިކަލްޗަރ މިނިސްޓްރީން ހާމަކުރައްވާފައިވާ ގޮތުގައި މިއަދު ވެވުނު މިއެއްބަސްވުމުގައި، މިނިސްޓްރީގެ ފަރާތުން ސޮއިކޮށްފައިވަނީ ފައިނޭންސް އެކްޒެކެޓިވް އަލްފާޟިލާ ފާތިމަތު ޝާޢިއާއެވެ. އަދި ވިސީ ގްރޫޕްގެ ފަރާތުން ސޮއިކޮށްފައިވަނީ އެކުންފުނީގެ މެނޭޖިންގް ޑިރެކްޓަރ އަލްފާޟިލް އިސްމާޢިލް ރަޝީދެވެ.

އެ މިނިސްޓްރީން ވިދާޅުވީ، ތަޖުރިބާކުރުމުގެ ގޮތުން ފަށާ މި ޕްރޮޖެކްޓަކީ، ރާއްޖެފަދަ ބިންކޮޅު ކުޑަ ޤައުމެއްގެ ކާނާގެ ޔަޤީންކަން ކަށަވަރު ކުރުމަށް، މިފަދަ ޤައުމެއްގައި އެންމެ އެކަށީގެންވާ ގޮތަށް ދަނޑުވެރިކަމުގެ އުފެއްދުންތެރިކަން އިތުރުކުރެވޭނެ ޒަމާނީ ގޮތްތައް ތަޢާރަފްކޮށްދިނުމަށް ސަރުކާރުން ޚާއްޞަ އަޙައްމިއްޔަތު ކަމެއް ދެއްވައިގެން ކުރައްވަމުން ގެންދަވާ މަސައްކަތްތަކުގެ ތެރޭގައި ހިމެނޭ މަސައްކަތެއް ކަމަށެވެ.

މިގޮތުން، މި މަޝްރޫޢުގެ ދަށުން ހަނިމާދޫ އެގްރިކަލްޗަރ ސެންޓަރުގައި 3 ވައްތަރެއްގެ ވާޓިކަލް ހައިޑްރޮޕޯނިކްސް ސެޓަޕް ޤާއިމްކުރެވޭނެ ކަމަށާއި، އޭގެ ތެރޭގައި ހިމެނެނީ މިހާރުވެސް ރާއްޖޭގެ ދަނޑުވެރިންނަށް ތަޢާރަފްކޮށްދީފައިވާ ނިއުޓްރިއެންޓް ފިލްމް ޓެކްނިކް ބޭނުންކޮށްގެން ވާޓިކަލް A ފްރޭމް ސްޓްރަކްޗަރގައި ގަސް ހައްދާ ނިޒާމު ޕައިލެޓްކުރުމާއި، ޕައިން އެޕަލް ޓަވަރ ސިސްޓަމް އަދި އޭރޯޕޯނިކްސް ޓަވަރ ސިސްޓަމްތަކުގެ ޕައިލެޓް ޓެސްޓްތައް ކުރިއަށް ގެންދިއުން ހިމެނޭނެ ކަމުގައި އެމިނިސްޓްރީން ވިދާޅުވެއެވެ. އެގްރިކަލްޗަރ މިނިސްޓްރީން ވިދާޅުވީ، މި ސިސްޓަމްތަކުގައި އެންމެ ފުރަމަ ޓެސްޓު ކުރުމަށް ހަމަޖެހިފައިވަނީ ފަތްތަރުކާރީއާއި ތަފާތު ހާބްސްގެ ބާވަތްތަކެއް ކަމަށާއި، މިއަދު ސޮއިކުރި އެއްބަސްވުމުގެ ދަށުން އެއްބަސްވުމުގައި ސޮއިކުރާ ތާރީޚުން ފެށިގެން 34 ވަނަ ދުވަހުގެ ކުރިން ސެޓަޕްތައް އިންސްޓޯލްކޮށް، ސިސްޓަމްތަކުގައި ގަސްތައް ރުވަންޖެހޭނެ ކަމަށެވެ.

މި ޕައިލެޓް މަޝްރޫޢުގެ ދަށުން ހަނިމާދޫ އެގްރިކަލްޗަރ ސެންޓަރުގައި މަސައްކަތް ކުރާ މިނިސްޓްރީގެ ފަންނީ މުވައްޒަފުންގެ ޓީމުން އެއްކުރާ މައުލޫމާތުތަކުގެ އަލީގައި ރާއްޖެއަށް އެންމެ އެކަށީގެންވާ ވާޓިކަލް ސިސްޓަމްތައް ދެނެގަނެ، އެ ސިސްޓަމްތައް ދަނޑުވެރިންނަށް ތަޢާރަފްކޮށްދިނުމުގެ މަސައްކަތް ކުރިޔަށް ގެންދާނެ ކަމުގައިވެސް އެގްރިކަލްޗަރ މިނިސްޓްރީން ވަނީ ވިދާޅުވެފައެވެ.