ރާއްޖެއިން މީހުން ޢުމުރާއަށް ގެންދިއުމުގެ ހުއްދަ ދީފައި ނުވާ ކުންފުންޏަކުން އުމުރާއަށް ގެންދާނެ ކަމަށް ބުނެ މީހުންގެ އަތުން ފައިސާ ނަގަމުންދާތީ އެކަމަށް ސަމާލުވުމަށް މިނިސްޓްރީ އޮފް އިސްލާމިކް އެފެއާޒުން އާއްމުންނަށް އިލްތިމާސްކޮށްފިއެވެ.

އެމިނިސްޓްރީން ހާމަކޮށްފައިވާ ގޮތުގައި، އަލް މަޝްޢަރު ހައްޖު އުމްރާ ކުންފުންޏާއި، ވަޑި ހައްޖު އެންޑް އުމްރާ ކުންފުންޏަކީ، ރާއްޖެއިން މީހުން ހައްޖާއި އުމުރާއަށް ގެންދިޔުމަށް ހުއްދަ ދީފައިވާ ދެކުންފުންޏެއް ނޫނެވެ. އެހެން ނަމަވެސް އެ ދެ ކުންފުނިން، މީހުން އުމުރާއަށް ގެންދާނެކަމަށް ބުނެ ޢިއުލާނުކޮށް އަދި ސޯޝަލް މީޑިއާގައި އިޝްތިހާރުކޮށް މީހުންގެ އަތުން ފައިސާ ނަގަމުންދާކަން އެމިނިސްޓްރީއަށް އެނގިފައިވާ ކަމުގައިވެސް އިސްލާމިކް މިނިސްޓްރީން ބުންޏެވެ.

އެމިނިސްޓްރީން ބުނީ، މީހުން ހައްޖާއި އުމުރާއަށްގެންދިޔުމަށް އެމިނިސްޓްރީން ހުއްދަ ދީފައިވާ ކުންފުނިތަކުގެ ލިސްޓް އެމިނިސްޓްރީގެ ވެބްސައިޓްގައި ޝާއިއުކޮށްފައި ވާނެ ކަމަށެވެ.

ރާއްޖެއިން މީހުން ހައްޖަށާއި އުމުރާއަށް ގެންދިޔުމުގައި ބައެއް ކުންފުނިތަކުން މަކަރާއި ހީލަތް ހެދި މައްސަަލަތައް މީގެ ކުރިންވެސް ފެންމަތިވެފައިވެއެވެ.