ރާއްޖޭގެ އަސްކަރިއްޔާއަށް ޒަމާނީ ވަސީލަތްތައް ހޯދުމަށް މަސައްކަތް ކުރަމުންދާ ކަމުގައި ޑިފެންސް މިނިސްޓްރީން ބުނެފިއެވެ.

އެމިނިސްޓްރީން މިކަން ހާމަކޮށް، ބަޔާނެއް ނެރެފައި ވަނީ ރާއްޖޭގެ އަސްކަރީ ބޭނުމަށް ހަނގުރާމަމަތީ ޑްރޯންތަކެއް ގަތުމަށް ދިވެހި ސަރުކާރާއި ތުރުކީވިލާތުގެ ކުންފުންޏަކާއި ދެމެދު އެއްބަސްވުމެއް ހަދާފައިވާކަމުގައި ބުނެ މީޑިއާގައި ޚަބަރުފެތުރިފައި ވަނިކޮށެވެ. އެހެން ނަމަވެސް ސީދާކޮށް އެމުއާމަލާތާއި ގުޅޭ އެއްވެސް ވާހަކައެއް ޑިފެންސް މިނިސްޓްރީން ނެރުނު ބަޔާނުގައި ހިމަނާފައެއް ނެތެވެ.

އެމިނިސްޓްރީގެ ބަޔާނުގައި ހަމައެކަނި ބުނެފައި ވަނީ، އަސްކަރިއްޔާގެ ވާޖިބާއި މަސްއޫލިއްޔަތު އަދާކުރުމުގެ ގާބިލުކަން ހުރި، އަދި ބަދަލުވަމުންދާ ސަލާމަތީ މަޝްރަހުގައި ކުރިމަތިލާން ޖެހިދާނެ ސަލާމަތީ ގޮންޖެހުންތަކާއި، ކޮންމެ ނުރައްކަލަކާ ކެރިގެން ކުރިމަތިލުމުގެ ގާބިލުކަން ހުރި ޒަމާނީ އަސްކަރިއްޔާ އަކަށް ދިވެހިރާއްޖޭގެ ގައުމީ ދިފާއީ ބާރު ހެއްދެވުމަކީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުހައްމަދު މުއިއްޒު އެންމެ އިސްކަން ދެއްވާ އެއްކަންތައް ކަމަށެވެ.

ޗައިނާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ވެލާނާ އެއާޕޯޓުގައި ދެއްވި ނޫސްބަޔާނުގައި ރައީސުލްޖުމްހޫރިއްޔާވެސް ވަނީ އެކަމަށް އަލިއަޅުއްވާލާފައެވެ.

އެދުވަހު ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، ރާއްޖޭގެ 9 ލައްކަ އަކަ ކިލޯ މީޓަރުގެ އެކްސްކްލޫސިވް އިކޮނޮމިކް ޒޯންގެ ސަރވޭލަންސް، އެ ސަރަޙައްދު އަބަދާއި އަބަދު ބެލެހެއްޓޭނެ ފެންވަރަށް ރާއްޖޭގެ އަމިއްލަ ބާރުވެރިކަން، އަމިއްލަ ކެޕޭސިޓީ ޤާއިމުކުރުމުގެ މަސައްކަތް ވަނީ ފަށާފައި ކަމަށެވެ. އަދި މާލަސްތަކެއްނުވެ ރާއްޖޭގެ ސަރަހައްދު ބެލެހެއްޓޭނެ އަމިއްލަ ކެޕޭސިޓީ ޤާއިމްކުރައްވާނެ ކަމުގައިވެސް ރައީސުލްޖުމްހޫރިއްޔާ އެދުވަހު ދެއްވި ނޫސްބަޔާނުގައި ވިދާޅުވިއެވެ.

ޑިފެންސްމިނިސްޓްރީން ނެރެފައިވާ ބަޔާނުގައި ބުނެފައި ވަނީ، އެއްގަމާއި ކަނޑާއި ވައިގެ މަގުން ރާއްޖެ ދިފާއުކޮށް ރައްކާތެރިކުރުމަށާއި ހާލުގައި ޖެހޭ މީހުންނަށް އެހީތެރިވުމަށް ކުރާ މަސައްކަތްތަކަށް ބޭނުންވާ ޒަމާނީ "ޕްލެޓްފޯމްތަކާއި ވަސީލަތްތައް" އެމްއެންޑީއެފްއަށް ހޯދައިދިނުމުގެ މަސައްކަތްތައް ކުރަމުން އަންނަ ކަމަށެވެ. އެހެން ނަމަވެސް އެމަސައްކަތްތަކުގެ ތަފްޞީލްތަކެއް ޑިފެންސް މިނިސްޓްރީން ހާމަކޮށްފައެއް ނުވެއެވެ.

ރާއްޖޭގެ ކަނޑާއި ވައިގެ ސަރަހައްދު ބެލެހެއްޓުމާއި، ސަވައިލެންސް އޮޕަރޭޝަންތަކާއި، ސާޗު އެންޑް ރެސްކިއު އޮޕަރޭޝަންތަކާއި، ވައިގެ މަގުން ބަލި މީހުން އުފުލުމުގައި މިހާތަނަށް އެމްއެންޑީއެފާއި ދިވެހި ސަރުކާރުން ބޭނުން ކުރަމުން އައިސްފައި ވަނީ އިންޑިއާ ސަރުކާރުން ރާއްޖެއަށް ހަދިޔާކޮށްފައިވާ ދެ ހެލިކޮޕްޓަރާއި، ޑޯނިއާ މަތިންދާ ބޯޓެވެ. އެއުޅަނދުތައް ދުއްވަން ތިބެނީ އިންޑިއާގެ ސިފައިން ކަމަށްވާއިރު، ރާއްޖޭގައި ތިބި އިންޑިއާ ސިފައިން މާރިޗުމަހުގެ 15ގެ ކުރިން ރާއްޖެއިން ފޭބުމަށް ސަރުކާރުން ވަނީ އަންގާފައެވެ.