ކުރީ ސަރުކާރުގައި ފެނަކަ އިންޖީނުގެތައް އެޅުމަށް ކޮންޓްރެކްޓް މުވައްޒަފުން ނަގައިގެން ކުރިމަސައްކަތުގައި ކުންފުންޏަށް ލިބިފައިވާ މާލީ ގެއްލުންތަކުން ތަފާސް ހިސާބުތައް އެކުންފުނީގެ މެނޭޖިންގ ޑައިރެކްޓަރ މުއާޛު މުޙައްމަދު ރަޝީދު ހާމަކުރައްވައިފިއެވެ.

ދިއްދޫ ފެނަކަ އިންޖީނުގެ އެޅުމުގެ މަސައްކަތަށް ފެނަކައަށް ނެގި ކޮންޓްރެކްޓް މުވައްޒަފުންގެ ކޮންޓްރެކްޓް އާނުކުރުމަށް ފެނަކައިން ނިންމުމާއި ގުޅިގެން ދިއްދޫގެ އެމުވައްޒަފުން ވަނީ ނުރުހުންފާޅުކޮށްފައެވެ. އެކަމާއި ގުޅިގެން މުއާޛު ވަނީ އެމަޝްރޫޢާއި އެހެން ބައެއް މަޝްރޫޢުތަކަށް ފެނަކައިން ކުރަން ޖެހުނު ޚަރަދުތަކުގެ ތަފްސީލްތައް ޙިއްޞާކުރައްވާފައެވެ.

މިގޮތުން މާކެޓު އަގަށް ބަލާއިރު، އެއިމާރާތަކީ، 23 މިލިއަނަށް އެޅޭނެ އިމާރާތެއް ކަމަށާއި، އެހެން ނަމަވެސް އެއިމާރާތުގެ މަސައްކަތަށް މިހާތަނަށް 49.3 މިލިޔަން ރުފިޔާ ހޭދަކޮށް އަދިވެސް އިމާރާތް ނިމިފައި ނުވާކަން މުއާޛު ފާހަގަ ކުރެއްވިއެވެ.

- އިންޖީނުގޭގެ ބޮޑުމިން - 1477.55 އަކަމީޓަރު

- މާކެޓް އަގުން އިންޖީނުގެ އެޅުމުގެ ޕްރޮޖެކްޓްގެ އަގު: 23،061،304.89ރ (ތޭވީސް މިލިޔަން ފަސްދޮޅަށް އެއްހާސް ތިންސަތޭކަ ހަތަރު ރުފިޔާ އައްޑިހަ ނުވަލާރި)

- އިންޖީނުގެ އިމާރާތްކުރުމުގެ މަސައްކަތަށް ނަގާފައިވާ ކޮންޓްރެކްޓް މުވައްޒަފުންގެ އަދަދު: 70

- މުސާރަޔާއި އެހެނިހެން އިނާޔަތްތަކާއެކު މުވައްޒަފުންނަށް ހިނގާފައިވާ ޚަރަދު: 23،269،119.42ރ (ތޭވީސް މިލިޔަން ދެލައްކަ ފަސްދޮޅަސް ނުވަހާސް ސަތޭކަ ނަވާރަ ރުފިޔާ ސާޅީސް ދެލާރި)

- ޕެޓީކޭޝް: 428،473.24ރ (ހަތަރު ލައްކަ އަށާވީީސް ހާސް ހަތަރު ސަތޭކަ ހަތްދިހަ ތިންރުފިޔާ. ސައުވިސް ލާރި)

- އިމާރާތްކުރުމަށް ބޭނުންވާ ތަކެއްޗަށް ހިނގި ޚަރަދު: 19،023،877.96ރ (ނަވާރަ މިލިޔަން ތޭވީސް ހާސް އަށް ސަތޭކަ ހަތްދިހަ ހަތްރުފިޔާ ނުވަދިހަ ހަލާރި)

- މުޅި ޕްރޮޖެކްޓަށް މިހާތަނަށް ހިނގާފައިވާ ޚަރަދު: 49،354،422.80ރ (ސާޅީސް ނުވަމިލިޔަން ތިންލައްކަ ފަންސާސް ހަތަރުހާސް ހަތަރުސަތޭކަ ބާވީސް ރުފިޔާ އައްޑިހަލާރި)

މީގެ އިތުރުން މުއާޛު ވަނީ، ގދ. ހޯޑެއްދޫގައި ފެނަކައިން ހިންގުމަށް ކަނޑައެޅި މަޝްރޫގެ އެއްވެސް މަސައްކަތެއް ކުރެވިފައިވާ ނުވާއިރު، ޕްރޮޖެކްޓް އަގަށް ވުރެ ބޮޑު ޚަރަދެއް މިހާރުވެސް ހިނގާފައިވާކަން ފާހަގަކުރައްވާފައެވެ.