ކުރީ ސަރުކާރުގެ ދުވަސްވަރު، ދިއްދޫ ފެނަކަ އައު އިންޖީނުގޭގެ މަސައްކަތަށް ނެގި ކޮންޓްރެކްޓް ސްޓާފުންގެ ކޮންޓްރެކްޓްތައް އައު ނުކުރީ އިމާރާތްކުރުމުގެ މަސައްކަތް ހުއްޓިފައި އޮތުމުން ކަމުގައި ފެނަކަ ކޯޕަރޭޝަނުން ބުނެފިއެވެ.

އެކޯޕަރޭޝަނުން ބުނީ، އެއިމާރާތުގެ މަސައްކަތް ހުއްޓިފައިވާތާ ދުވަސްތަކެއް ވެފައިވާ ކަމަށެވެ. ފެނަކައިގެ ދަރަނިތައް ބޮޑުވެ އެކުންފުންޏަށް ބޮޑެތި ގޮންޖެހުންތަކާއި ކުރިމަތިވެފައިވާތީ، މަސައްކަތް ނުހިނގާ ސައިޓްތަކަށް ނެގި ކޮންޓްރެކްޓް ސްޓާފުންގެ ކޮންޓްރެކްޓް އައު ނުކުރާނެ ކަމުގައި ކުރިންވެސް ފެނަކައިން އޮތީ ބުނެފައެވެ.

އެހެން ނަމަވެސް މިއަދު، ހއ. ދިއްދޫގައި ފެނަކަ ކޮންޓްރެކްޓް މުވައްޒަފުންގެ މަސައްކަތް ކުރުމަށް ނަގާފައިވާ ގިނަ އަދަދެއްގެ މުވައްޒަފުން ވަނީ، އެމީހުންގެ ކޮންޓްރެކްޓް އައު ނުކުރުމުގެ ސަބަބުން ވަޒީފާގެއްލުމާއި ގުޅިގެން އިހްތިޖާޖުކޮށްފައެވެ.

ވަޒީފާ ގެއްލުނު ހުރިހާ މުވައްޒަފުންނަކީވެސް، ދިއްދޫ ފެނަކަ އައު އިންޖީނުގެ އިމާރާތްކުރުމުގެ މަސައްކަތަށް ކޮންޓްރެކްޓް މުވައްޒަފުންގެ ގޮތުގައި ނަގާފައިވާ މުވައްޒަފުންނެވެ. އެސައިޓްގެ މަސައްކަތް ހުއްޓިފައި ވިޔަސް ކޮންޓްރެކްޓްގެ މުއްދަތު ހަމަވުމާއި ހަމައަށް ފެނަކައިން އައީ އެމުވައްޒަފުންނަށްވެސް މުސާރަޔާއި ޢިނާޔަތްތައް ދެމުންނެވެ.

ފެނަކަ ކޯޕަރޭޝަން ހިންގުމަށް ދިމާވެފައިވާ މާލީ ދަތިތަކާއި ގުޅޭ ގޮތުން މީޑިއާތަކަށް މައުލޫމާތު ދެއްވަމުން ފެނަކަ ކޯޕަރޭޝަންގެ މެނޭޖިންޑ ޑައިރެކްޓަރ މުއާޒް މުހައްމަދު ރަޝީދު ވިދާޅުވީ، ކުންފުނީގެ އާމްދަނީއާ ނުބައްދަލު އަދަދަކަށް ރިކަރެންޓް ޚަރަދު ބޮޑުވެގެން ގޮސްފައި ވަނީ އެކަށީގެންވާ އަދަދަށްވުރެ މާގިނައިން ކުންފުންޏަށް މުވައްޒަފުން ނަގާފައި ވާތީ ކަމަށެވެ. އެހެންކަމުން ކުންފުނި ސަލާމަތްކުރެވެން އޮތީ، ޚަރަދުތައް ކުޑަކުރެވެން އޮތް ހުރިހާ ދިމާއަކުން ކުޑަކޮށްގެން މުއާޒް ފާހަގަކުރައްވާފައިވެއެވެ.

ފެނަކަ ކޯޕަރޭޝަންގެ ދަރަނި، 4 ބިލިއަނަށްވުރެ މައްޗެވެ.